Qozog‘istonda o‘rmon yong‘inlari sun’iy intellekt yordamida aniqlanadi. Bu haqda “Zakon.kz” xabar berdi.

Qayd etilishicha, buni Ekologiya va tabiiy resurslar vaziri Erlan Nisanbaev 2024-yil 12-fevral kuni Majlisda bo‘lib o‘tgan hukumat soatida ma’lum qilgan.

Vazirning so‘zlariga ko‘ra, o‘rmon xo‘jaligida raqamlashtirishni joriy etish orqali o‘rmon yong‘inlarini barvaqt aniqlash loyihasi Prezident huzuridagi raqamlashtirish komissiyasi tomonidan ma’qullangan.

“Sun’iy intellektdan foydalangan holda dasturiy ta’minotning tegishli texnik tavsiflari ishlab chiqildi. Loyiha doirasida mamlakatimiz o‘rmonlari hududida yong‘inlarni erta aniqlash va tezkor qaror qabul qilish, monitoring qilish bo‘yicha yagona Vaziyat markazini tashkil etish rejalashtirilgan.

O‘tgan yili “Ertis o‘rman” qo‘riqxonasi va “Ko‘kshetau” milliy bog‘ida ham bunday tizim joriy etildi. “Burabay” milliy bog‘i va “Medeu” tabiat bog‘ida ham shunday tizimlar mavjud. “Burabay” milliy bog‘ida joriy etilgan tizim o‘z samarasini ko‘rsatdi. Masalan, avvallari o‘rmon yong‘inlarining o‘rtacha maydoni 80 gektarni tashkil etgan bo‘lsa, tizim joriy etilgandan so‘ng u 1,5 gektarga kamaydi”, – deydi Erlan Nisanbaev.

Unga ko‘ra, yong‘inlar radiusi 30 km.gacha bo‘lgan maxsus kuzatuv kameralari orqali aniqlanadi.

• sun’iy intellekt
• yong‘in