Kecha, 4-noyabr kuni Turkiya Prezidenti Rajab Toyyib Erdo‘g‘an davlat tashrifi bilan Qirg‘izistonga yetib borgan. U 6-noyabr kuni bo‘lib o‘tadigan Turkiy davlatlar tashkiloti Davlat rahbarlari kengashining 11-sammitida ishtirok etadi. Bu haqda “24.kg” xabar bermoqda.

Turkiya rahbari va birinchi xonim Emine Erdo‘g‘anni Bishkek shahridagi “Manas” xalqaro aeroportida Prezident Sadir Japarov kutib olgan.

Ta’kidlanishicha, tashrif doirasida Qirg‘iziston va Turkiya rahbarlarining tor doiradagi muzokaralari, shuningdek, ular raisligida strategik hamkorlik bo‘yicha Oliy kengashning oltinchi yig‘ilishi bo‘lib o‘tishi belgilangan.

Bundan tashqari, tashrif yakunlari bo‘yicha ikki davlat o‘rtasidagi strategik hamkorlikni kengaytirish va davlatlararo munosabatlarni yanada mustahkamlashga qaratilgan qator ikki tomonlama hujjatlar imzolanishi rejalashtirilgan. Shuningdek, tomonlar qirg‘iz-turk hamkorligiga oid keng ko‘lamli masalalarni muhokama qiladi.

• Erdogʻan
• Prezident
• Qirg‘iziston
• Tashrif
• Turkiya