“Oʻzbekneftegaz” boshqaruv raisi, “Bunyodkor” klubi prezidenti Mehriddin Abdullayev boshchiligidagi yigʻilishda klub bosh direktori va bosh murabbiyi lavozimidan ozod etildi.

Klub rahbariyati, futbolchilar va Fan klub aʼzolari ishtirokida oʻtkazilgan yigʻilishda soʻnggi vaqtda klubdagi nosogʻlom muhit, klubning Superligadagi salbiy ishtiroki keskin tanqid qilingan.

Barcha sharoitlar yaratib berilganiga qaramay kutilgan natijani bermayotgani, bunga soʻnggi vaqtlarda, asosiy jamoaning koʻrsatayotgan oʻyinlari va erishgan natijalaridan ham koʻrish mumkinligi, xususan, Superliga joriy mavsumining 18-turidan soʻng jamoa 20 ochko jamgʻargan holda 9-oʻrinda borayotgani tanqid ostiga olingan.

Taʼkidlanishicha, 18 ta oʻyinda 20 ta gol urilgan boʻlsa, 29 ta toʻp oʻtkazib yuborilgan yoki toʻplar nisbati – 9. Superliganing 2021-yil mavsumida jamoa 18-turdan soʻng 29 ochko jamgʻargan holda 5-oʻrinni egallab turgan edi. Toʻplar nisbati esa + 12.

Mehriddin Abdullayev holat shu tarzda davom etadigan boʻlsa, “Bunyodkor” oʻzi tarixidagi eng sharmandali holatga tushishi, achinarlisi esa Superligani joriy yil yakuni bilan tark etishi mumkinligidan xavotir bildirgan.

Bunday salbiy natijalar uchun avvallari moliyalashtirishdagi muammolar bahona qilingani, hozirda moliyalashtirishda muammo yoʻqligi aksincha klub va direksiya uchun zarur barcha mablagʻlar, oylik-maoshlari va mukofot pullari oʻz vaqtida moliyalashtirilayotgani aytilgan.

Yuqoridagilar klub direktori Mirzayev Ulugʻbek hamda asosiy jamoa murabbiyi Viktor Karpenkoning oʻz vazifalarini yetarli darajada bajarmayotganligidan dalolat berayotgani maʼlum qilingan hamda yuqoridagilardan kelib chiqib, klub direktori Ulugʻbek Mirzayev lavozimidan ozod etilib, uning oʻrniga “Bunyodkor” Akademiyasi direktori Aziz Haydarov tayinlangan.

Asosiy jamoa murabbiyi Viktor Karpenko oʻrniga “Bunyodkor” U-21 jamoasi bosh murabbiyi Ivan Boshkovich tayinlangan.

Boshkovich futbolchi va murabbiy sifatida Yevropa futboli bilan tanish. Uning tajribasi jamoadagi natijalarni oʻzgartirishiga umid bildirilgan.

Ivan Boshkovichga avvalo jamoadagi muhitni oʻzgartirish, futbolchilar bilan alohida ishlash boʻyicha topshiriq va vazifalar berilgan. Shuningdek, Bosh murabbiy faoliyatiga har qanday aralashuv jazolanishi taʼkidlandi.

Akademiya rahbari sifatida shu kunga qadar faoliyat yuritib kelgan Aziz Haydarovning Klub Bosh direktori boʻlgani sabab, “Bunyodkor” akademiyasi direktorligiga Akademiyada faoliyat yuritib kelayotgan Islom Ahmedov tayinlangan.

Islom Ahmedov futbolda katta tajribaga ega ekspert hisoblanib, Akademiya rahbarligiga aynan shunday mutaxassis kerakligi bugungi kun talabi ekanligi aytilgan.

• Bunyodkor
• Futbol
• Iste'fo
• Superliga