Muxlislar tomonidan Madridning “Real” klubi prezidenti Florentino Peresdan hujumchi Krishtianu Ronaldu bilan shartnoma imzolash so‘ralgan.

As xabariga ko‘ra, Ispaniya chempioni rahbari jamoa yangi mavsumga tayyorgarlik ko'rayotgan Los-Anjelesga yetib keldi va mashg‘ulot majmuasiga yig‘ilgan muxlislarga 15 daqiqa davomida dastxat qo‘ydi.

Muxlislar Chempionlar ligasida 15-marta g‘alaba qozonish kabi turli takliflar bilan hayqirishdi va tadbirga tashrif buyurganlardan biri Peresdan hujumchi Krishtianu Ronalduni jamoaga qaytarishni so‘radi.

“Uning “Atletiko”ga o‘tishiga yo‘l qo‘ymang!” – dedi muxlis. Prezident hech qanday munosabat bildirmadi, biroq bu gapni boshqa bir qator muxlislar qo‘llab-quvvatladi.

Hozirda “Manchester Yunayted”ga tegishli bo‘lgan Ronaldu 2009-yildan 2018-yilgacha “Real”da o‘ynagan. Portugaliyalikning klubini o‘zgartirish niyati tufayli “Atletiko” uni sotib olmoqchi ekanligi xabar qilingan edi.

• Atletiko Madrid
• Florentino Peres
• Futbol
• Ronaldu
• Transferlar