Kecha, 23-mart oqshomida FIFA kunlari doirasida bir qator terma jamoalar oʻz oʻyinlarini oʻtkazishdi.
Xususan, Yevropa chempionati-2024 saralashining 1-bosqichi doirasida Portugaliya Lixtenshteyn terma jamoasini qabul qilib, yirik 4:0 hisobida zafar quchdi.
Ushbu oʻyinda Ronaldu dubl qayd etib, terma jamoaning rasmiy uchrashuvida 100 ta gol urgan tarixdagi birinchi futbolchiga aylandi.
Shu bilan birga, Lixtenshteyn bilan bahs Ronalduning xalqaro miqyosdagi faoliyatida 197-oʻyin boʻldi. Ushbu koʻrsatkich boʻyicha ham u jahon rekordchisiga aylandi.
Ronaldu terma jamoadagi oʻyinlari soni boʻyicha Quvayt terma jamoasida 196 ta oʻyinda maydonga tushgan Bader Al-Mutava va 195 ta bahs oʻtkazgan Malayziya terma jamoasi aʼzosi So Chin Ennani ortda qoldirdi.
Shuningdek, kecha Angliya terma jamoasi Yevro-2024 saralashi doirasida Italiyani 2:1 hisobida magʻlubiyatga uchratdi.
Inglizlar sardori Harri Keyn jamoasining ikkinchi goliga mualliflik qildi. Bu toʻp hujumchining Angliya terma jamoasi safidagi 54-goli boʻldi va bu uni milliy terma jamoa tarixidagi eng yaxshi toʻpurarga aylantirdi.
Keyn 53 ta gol bilan toʻpurarlar roʻyxatida “Manchester Yunayted” va “Everton”ning afsonaviy hujumchisi Ueyn Runidan oʻzib ketdi.
Bundan tashqari, Argentina terma jamoasi Panamaga qarshi oʻrtoqlik oʻyinida maydonga tushib, 2:0 hisobida gʻalaba qozondi. Mazkur bellashuvda Lionel Messi professional faoliyatidagi 800-golini urdi.
Qayd etish mumkin, bungacha argentinalik yulduz klublar miqyosida 701, terma jamoa safida esa 99-marta gol urishga muvaffaq boʻlgan.
Maʼlumot oʻrnida, 2005-yildan buyon Argentina terma jamoasi safida toʻp tepayotgan Messi terma jamoaning eng yaxshi toʻpurari hisoblanadi.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!