Rossiya Bosh vaziri Mixail Mishustin Samarqandga keldi. Uni aeroportda O‘zbekiston Bosh vaziri Abdulla Aripov kutib oldi.

Qayd etilishicha, Mishustinning O‘zbekistondagi ish dasturi bugun, 2-dekabr kuni boshlanadi. U Abdulla Aripov bilan ikki tomonlama komissiya yig‘ilishini o‘tkazadi.

“Qo‘shma komissiyada O‘zbekiston-Rossiya hamkorligining dolzarb masalalari muhokama qilinadi. Savdo-iqtisodiy, sanoat va energetika sohalarida ishlashga alohida eʼtibor qaratilishi rejalashtirilmoqda”, – deb yozadi “Interfaks”.

Ikki bosh vazirlar 2-dekabr kuni Samarqandda bo‘lib o‘tadigan Rossiya-O‘zbekiston biznes-forumining yalpi majlisida nutq so‘zlashi kutilmoqda. Tadbirda ishbilarmon doiralar vakillari savdo-iqtisodiy hamkorlik, transport-logistika, shuningdek, sanoat loyihalari va sanoat klasterlarini rivojlantirish masalalari muhokama qilinadi.

Taʼkidlanishicha, forumda Rossiya tomonida 150 dan ortiq tashkilotdan 360 dan ortiq kishi ishtirok etadi.

Tadbir oldidan Mishustin “O‘zbekistonda ishlab chiqarilgan” nomli milliy sanoat ko‘rgazmasiga ham tashrif buyuradi.

• Aripov
• O‘zbekiston
• Rossiya
• Samarqand