Novosibirskda bir yarim yoshli qizini qiynoqqa solishda ayblanib, uning o‘limiga sabab bo‘lgan o‘zbekistonlik ayolga nisbatan sud hukmi chiqarildi. Hozirda unga nisbatan umumiy tartibli koloniyada 4 yil ozodlikdan mahrum qilish jazosi tayinlangan. Bu haqda Rossiya Tergov qo‘mitasining Novosibirsk viloyati bo‘yicha boshqarmasi matbuot xizmati xabar bermoqda.

Joriy yilning yanvar oyida o‘zbekistonliklar Rossiyada o‘zining voyaga yetmagan farzandini o‘ldirib, dafn etgani haqida xabar bergan edik. Andijon viloyatida tug‘ilgan 28 yoshli ayol turmush o‘rtog‘i bilan 2016-yildan beri Novosibirskda yashagan.

Tergov jarayonlarida aniqlanishicha, ayol 2021-yilning iyunidan avgustigacha bo‘lgan davrda bir yarim yoshli qiziga hatto ahamiyatsiz sabablarga ko‘ra ham bo‘ysunmagani uchun kaltaklash orqali muntazam ravishda jismoniy va ma’naviy azob bergan.

Ma’lum bo‘lishicha, 2021-yil avgust oyida esa qizcha vafot etgan, ona esa tibbiyot muassasalariga murojaat qilmasdan, qizini tomorqaga o‘zi ko‘mgan.

Ayol Rossiya Federatsiyasi JKning 117-moddasi 2-qismi “g” bandida (qiynoqqa solish, ya’ni aybdorga moddiy yoki boshqa jihatdan qaram bo‘lgan voyaga yetmagan shaxsga nisbatan muntazam ravishda kaltaklash yo‘li bilan jismoniy yoki ruhiy azob berish) nazarda tutilgan jinoyatni sodir etganlikda aybdor deb topilgan.

Endi u umumiy tartibli koloniyada 4 yil ozodlikdan mahrum etiladi.

• Jinoyat
• Rossiya