Belarus prezidenti Aleksandr Lukashenko Rossiyadagi prezidentlik saylovlari natijalari G‘arbga Rossiyani ichkaridan yengib bo‘lmasligini ko‘rsatib berganini ma’lum qildi. Bu haqda “TASS” nashri xabar berdi.

“Bu Rossiya ichidagi vaziyatni larzaga keltirmoqchi bo‘lgan G‘arbga jiddiy signal bo‘ldi. Ular agar olddan maqsadga erisha olmasalar, orqadan harakatga kirishadilar. Lekin baribir muvaffaqiyatsizlikka uchraydilar”, – degan Belarus rahbari.

Lukashenkoga ko‘ra, hech kim Belarus va Rossiya xalqlarini hech narsaga majburlay olmaydi. Hech kimda bunday kuch va salohiyat yo‘q.

Belarus rahbari o‘z nutqida Rossiyada saylov jarayoni namunali tashkil etilganini maqtagan. Shuningdek, Rossiya rahbari mamlakatga hali ko‘p kerak bo‘lishini ta’kidlagan.

“Prezident (Vladimir Putin) juda ko‘p ishlashi kerak edi, buni ko‘rdingiz. U butun Rossiya bo‘ylab sayohat qildi, turli joylarda bo‘ldi va rus xalqining savollariga javob berdi. Saylov jarayoni murakkab tarzda o‘tdi. Hali bu borada o‘rganadiganlarimiz ko‘p.

Xalq birlashdi, uyushdi. Odamlar vatanparvarlik ko‘rsatdi. Natija esa hammaga ayon. Bu biz uchun saboq bo‘ldi”, – degan Belarus Respublikasi rahbari Aleksandr Lukashenko.

• Lukashenko
• Putin
• saylov