Coca-Cola Superliga 17-turidan oʻrin olgan “Nasaf” — “Lokomotiv” uchrashuvi yakuniga etgach mezbonlar ustozi Roʻziqul Berdiyev hakamlar joy olgan maydon markaziga qarab bordi va ularga nisbatan nomaqbul harakatlarni amalga oshirdi.

Uchrashuv yakuniga yetgach mazkur masala yuzasidan bosh hakam Ahrol Risqullayev hamda OʻzPFL komissari bildirgi taqdim etgan.

Unda qayd etilishicha, uchrashuv yakuniga yetishi bilan “Nasaf” futbol klubining qator futbolchilari hamda bosh murabbiy Roʻziqul Berdiyev hakamlar brigadasini oʻrab olgan.

Bu vaqtda bosh murabbiy bosh hakam libosini qoʻpol tarzda tortgan hamda uning qorin qismiga zarba bergan. Shundan kelib chiqib, OʻzPFL Roʻziqul Berdiyevga taqdim etilgan akkreditatsiyani tegishli qoʻmitalar mazkur vaziyatni oʻrganib chiqquniga qadar qaytib oladi.

Bosh murabbiy Oʻzbekiston Coca-Cola kubogining 1/4 finalidan joy olgan “Lokomotiv”ga qarshi uchrashuv qaydnomasiga kiritilmaydi.

Chempionatning 18-turini oʻtkazish uchun “Nasaf” 10-sentyabr kuni Olmaliq shahriga tashrif buyuradi. Shundan kelib chiqib, OʻzPFL tegishli qoʻmitalar ishtirokidagi yigʻilishni 9-sentyabr kuni oʻtkazish taklifini OʻFAga kiritdi. Bunda qaror bir tomonlama koʻrib chiqilmasligini taʼminlash maqsadida qoʻmitalar yigʻilishiga Roʻziqul Berdiyev va Ahrol Risqullayevning oʻzi ham taklif etilishi koʻzda tutilgan.

Bayram sababli dam olish kunlarining avvaldan belgilab qoʻyilgani, shuningdek, “Nasaf” ustozining Toshkentga kelishida muammo yuzaga kelmasligini taʼminlash maqsadida 8-sentyabr sanasi tanlab olindi. Berdiyevning akkreditatsiyasini qaytarish masalasi qoʻmitalar qaroridan keyin hal etiladi.

Maʼlumot uchun, hakamlar qaroriga shikoyat berish tartibi Reglamentning 14-bobida batafsil tushuntirib oʻtilgan. Garchi “Nasaf” jamoasi hakamlar brigadasiga etika normalariga zid ravishda eʼtiroz bildirgan boʻlsa-da, klub 14-bob boʻyicha rasmiy eʼtiroz bilan chiqmagan.

• Futbol
• Nasaf
• O‘zbekiston
• UzPFL