Ruminiya va Gretsiyada jazirama va shamol tufayli o‘rmon yong‘inlari avj oldi, deb yozadi “Euronews”.
Issiq va quruq havo Ruminiyaning bir qancha okruglarida o‘rmon yong‘inlariga sabab bo‘ldi. O‘t o‘chiruvchilar tilsiz dushmanning turar-joy binolariga yetib borishiga yo‘l qo‘ymaslikka harakat qilmoqda. Ular yong‘inning o‘rmon hududlari bo‘ylab tarqalishiga yo‘l qo‘ymoqchi emas.

Nyams okrugi hukumati bir vaqtning o‘zida bir nechta o‘rmon yong‘inlari sodir bo‘lganidan so‘ng, uch kundan buyon yuqori shay holatga keltirildi. Ayrim hududlarda suv tanqisligi kuzatilmoqda.

Gretsiyada o‘t o‘chiruvchilar va favqulodda xizmatlar Afina yaqinidagi o‘rmonda XII asr monastirida shu payshanba kuni keng ko‘lamli mashg‘ulotlarda ishtirok etdi. Maqsad, odatda may oyida sodir bo‘ladigan yuqori yong‘in mavsumiga tayyorgarlik ko‘rishdir.

Biroq mart oyi oxirida mamlakatda havo harorati Selsiy bo‘yicha 30 darajaga yetdi va o‘rmon yong‘inlari rejalashtirilganidan bir necha hafta oldin boshlandi.

Kun sayin ortib borayotgan haddan tashqari issiqlik tufayli Gretsiyadagi o‘rmon yong‘inlari ham kuchayib bormoqda. 2018-yilda Attikadagi yong‘in so‘nggi 150 yildagi eng halokatli yong‘in sifatida qayd etildi va yuzdan ortiq odam halok bo‘ldi.

• Gretsiya
• Ruminiya
• yong‘in