Toshkentda “Zakovat” intellektual o‘yinining birinchi Osiyo ochiq chempionati yakunlandi. Yopilish marosimi 13-avgust, yakshanba kuni “O‘zbekkino” ochiq pavilyonida tashkil etildi.

Marosimga Prezident administratsiyasi ijro etuvchi apparatining Kommunikatsiyalar va axborot siyosati bo‘yicha sho‘ba mudiri Saida Mirziyoyeva tashrif buyurdi.

“Men bunday ajoyib o‘yinlarni taqdim etgan barcha ishtirokchilar, ularning ota-onalari va ustozlarini alohida tabriklayman. Toshkent — barchamiz uchun butun dunyoni hamjihatlik, do‘stlik va insoniylik sari o‘zgartirgan burilish nuqtasi bo‘lib qolishiga umid qilib qolaman”, – deb yozdi Saida Mirziyoyeva o‘z Telegram sahifasida.

Ikki kunlik yirik turnirda O‘zbekiston, Isroil, Kipr, Germaniya, Armaniston, Qozog‘iston, Belarus, BAA, Latviya, Daniya, Turkmaniston, Qirg‘iziston, Tojikiston, Rossiya kabi 14 mamlakatdan 55 ta jamoa g‘oliblik uchun kurash olib bordi. 

Turnir sportcha versiyasi hamda breyn-ring o‘yini bo‘yicha olib borildi. Sportcha shakli uchun musobaqa 6 ta turga ajratildi va har bitta tur uchun 15 ta savol o‘ynaldi.

“Zakovat” o‘yinining sportcha versiyasida g‘olib jamoalar quyidagi miqdorda taqdirlandi:

• 1-o‘rin: 100 million so‘m — GG (O‘zbekiston, Qozog‘iston, Armaniston);
• 2-o‘rin: 60 million so‘m — “Borskiy korabl” (Rossiya);
• 3-o‘rin: 40 million so‘m — “Basendji” (Rossiya, Qozog‘iston).

Breyn-ring o‘yinida esa g‘olib Qozog’iston va Rossiya vakillaridan iborat jamoa “Basendji” jamoasiga maxsus tayyorlangan birinchi Osiyo ochiq chempionati kubogi topshirildi. 

• Saida Mirziyoyeva
• Zakovat