Samarqand, Jizzax va Andijon viloyatlarida o‘qishga kiritib qo‘yishni va’da qilgan firibgarlar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamentining matbuot xizmati xabar berdi.

Qayd etilishicha, Bosh prokuratura huzuridagi  Departament hamda DXXning Samarqand viloyati boshqarmalari tomonidantezkor tadbir o‘tkazilgan. Ushbu tadbir davomida  aniqlanishicha, fuqaro Sh.Sh. boshqa bir fuqaro Sh.ga Qozog‘iston Respublikasidagi universitetning 1-kursini tamomlaganligi haqida hujjat tayyorlab berib, keyinchalik ushbu hujjat asosida Samarqand iqtisodiyot va servis institutiga o‘qishga kiritib qo‘yishni va’da qilgan. Buning evaziga esa undan 4 000 AQSh dollari so‘ragan.

Shundan so‘ng, fuqaro Sh.Sh kelishilgan pullarni olgan vaqtida huquq tartibod organi xodimlari tomonidan  ashyoviy dalillar bilan ushlangan.

Shu kabi, Departamentning Jizzax viloyat boshqarmasi tomonidan IIB xodimlari bilan hamkorlikda tezkor tadbir o‘tkazilgan. Unda, muqaddam firibgarlik va boshqa jinoyatlari uchun sudlangan F.S. fuqaro Z.ning ishonchiga kirib, uni tanishlari yordamida 2 000 AQSH dollari evaziga Jizzax davlat pedagogika universitetiga o‘qishga kiritib qo‘yishni va’da qilgani aniqlangan. Shundan keyin, fuqaro F.S oldindan 5 mln so‘mni olgan vaqtida ashyoviy dalillar bilan ushlangan.

Xuddi shunday, Andijon viloyat boshqarmasi tomonidan IIB xodimlari bilan hamkorlikda tezkor tadbir o‘tkazilib, Paxtaobod tumanidagi Abu Ali ibn Sino jamoat salomatligi texnikumi talabasi O.D. fuqaro G.ning farzandini tanishlari yordamida ushbu texnikumga o‘qishga kiritib qo‘yish evaziga 700 AQSH dollarini olgan vaqtida ashyoviy dalillar bilan ushlangan.

Xabarga ko‘ra, mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Andijon
• Jinoyat
• Jizzax
• Samarqand