Samarqandda 1 dona “Makarov” pistoleti va uning 96 dona o‘q-dorisini 10 ming AQSh dollariga sotmoqchi bo‘lgan shaxs ushlandi. Bu haqda DXX xabar berdi.

Qayd etilishicha, DXXning Samarqand viloyati bo‘yicha boshqarmasi xodimlari tomonidan Jomboy tumanida tezkor tadbir o‘tkazilgan.

Unda Toshkent shahrida yashovchi, 1977-yili tug‘ilgan, muqaddam Jinoyat Kodeksining 251-1 va 246-moddalari bilan sudlangan shaxs narsalarni sotmoqchi bo‘lgan vaqtida qo‘lga olindi.

Shuningdek, uning yashash xonadonida tintuv o‘tkazilganda, foydalanishga yaroqli deb topilgan, kalibri 5,6 mm bo‘lgan eski rusumdagi “Monte Kristo” to‘pponchasi, turli xil gilzalar, ov miltig‘i qismlari, o‘tkir tig‘li jismlar hamda boshqa ashyoviy dalillar protsessual tartibda rasmiylashtirib olingan.

Hozirda mazkur shaxsga nisbatan Jinoyat Kodeksining 248-moddasi 3-qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.

• IIBB
• Jinoyat
• Samarqand