Samarqanddagi bolani otasi urmaganligi aytilmoqda. Videodagi gaplar bolaga o‘rgatilgan bo‘lib chiqdi. Hozirda videoni tarqatganlarga chora ko‘rish bo‘yicha ish olib borilmoqda.
Avvalroq, Samarqandda yosh bola ayanchli kaltaklangani, oqibatida ko‘zi jarohatlangani haqida xabarlar tarqalgandi. Ijtimoiy tarmoqlarda tarqalgan videoda bolakay uni otasi urganini aytgandi.
Viloyat IIBning xabar berishicha, aslida hodisa 29-oktyabrda sodir bo‘lgan. Video esa kuni kecha ijtimoiy tarmoqqa tarqatilgan. Aniqlanishicha, bolakay 29-oktyabrda otasi tomonidan otasining yashash uyiga olib ketilgan. O‘sha kuni u ko‘chada o‘ynayotgan vaqtida yiqilib, tan jarohati olgan.
Bolani aynan otasi shifoxonaga olib kelgan. Shuningdek, voqeaga guvoh bo‘lgan qo‘shni erkak ham bola haqiqatda yiqilib tushganini ma’lum qilgan. Bolaning otasining aytishicha, videoni qaynonasi ya’ni, bolaning buvisi ataylab chiqargan.
“Bola yiqilgan. Ko‘rganlar, guvohlar bor. Qaynonam o‘rtaga tushib, shu ishlarni qilgan. Ular tuhmat qilishyapti”, — deydi bolaning otasi.
Ma’lum bo‘lishicha, u ayoli bilan bir yil avval ajrashgan. Bola onasi bilan birga yashaydi. Ammo, bolaning buvisi otasi urganligini aytmoqda. Sababi, turmushi davomida uning qizini ham muntazam kaltaklab kelgan.
“Nevaramdan so‘rasam, ”Dadam urdi. Men urganimni hech kimga aytma. Agar aytsang, militsiya seni qamaydi, deb qo‘rqitdi", dedi. Keyin, men qo‘rqma, to‘g‘risini ayt bolam, desam ham dadam urgan, deyapti. Qizim kuyovim bilan 8 yil yashadi. Har haftada ikki, uch marta vahshiylarcha kaltaklardi. Videoni biz olganmiz, rost. Lekin, uni tarqatib yubormaganmiz. Kim tarqatganini bilmadim”, — deydi bolaning buvisi.
Viloyat IIB xabar berishicha, guvohlarning ko‘rsatmalari va ekspertiza xulosasiga ko‘ra, holat yuzasidan jinoyat ishi qo‘zg‘atishni rad etish to‘g‘risida qonuniy qaror qabul qilingan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!