Saudiya Arabistoni Afrika mamlakatlari bilan neft qazib olish kvotalari miqdorini kamaytirish bo‘yicha muzokaralar olib borishga harakat qilmoqda. Bu haqda The Wall Street Journal o‘z manbalariga tayanib xabar berdi.

“Saudiya Arabistoni kichik afrikalik ishlab chiqaruvchilardan kvotalar kamaytirishni talab qildi. Shu bilan birga, qirollik guruhning nufuzli a’zosi bo‘lgan Birlashgan Arab Amirliklari (OPEC va OPEC+) bilan hamkorlik qilish va ishlab chiqarish hajmini oshirish imkoniyatini muhokama qilmoqda”, – deyiladi xabarda.

Qayd etilishicha, Saudiya Arabistoni Energetika vaziri shahzoda Abdulaziz bin Salmon 3-iyun, shanba kuni ba’zi afrikalik delegatlarni Venadagi mehmonxonasiga taklif qilgan va ularga ishlab chiqarish kvotalari qisqartirilishi kerakligini aytgan. Qayd etilishicha tomonlar uchrashuvni kelishuvsiz tark etishgan.

Yakshanba kuni Venada OPEC+ davlatlarining bir qator uchrashuvlari bo‘lib o‘tadi, unda neft bozoridagi vaziyat va ishlab chiqarishni cheklash bo‘yicha kelishuv kelajagi muhokama qilinadi. Bir kun avval OPEC konferensiyasi yig‘ilishi bo‘lib o‘tdi. Eron neft vaziri o‘rinbosari Amir Husayn Zaminiyaning jurnalistlarga ma’lum qilishicha, tashkilot davlatlari unda neft qazib olishni qisqartirish variantlarini muhokama qilmagan, chunki bu butun OPEC+ alyansi yig‘ilishining mavzusi hisoblanadi.

Dastlab neft kelishuvi shartlarida hech qanday o‘zgarishlar kutilmagan bo‘lsa-da, Reuters nashri OPEC+ boshqa variantlar qatorida ishlab chiqarishni kuniga qo‘shimcha 1 million barrelga qisqartirish masalasi muhokama qilinayotganini aytdi.

OPEC+ davlatlari kelishuv doirasida 2023-yil oxirigacha neft qazib olishni kuniga 2 million barrelga qisqartirmoqda. Shu bilan birga, aprel oyida alyansga a’zo qator davlatlar, jumladan, Saudiya Arabistoni ham may oyidan boshlab kvotadan ortiq qazib olishni yil oxirigacha ixtiyoriy ravishda kuniga 1,16 million barrelgacha qisqartirishni e’lon qildi.

• Afrika
• Saudiya Arabistoni
• neft