Savdo-sanoat palatasi Navoiy viloyati boshqarmasi boshlig‘i ikki jinoyatda gumonlanayotgani haqida xabar berilgandi. Palata holat yuzasidan rasmiy izoh berdi.

Ijtimoiy tarmoqlarda mart oyi avvalida Savdo-sanoat palatasi Navoiy viloyati boshqarmasi boshligʻi etib tayinlangan, bunga qadar hokim yordamchisi boʻlib ishlagan Merey Omonboyevaga nisbatan jinoyat ishi qoʻzgʻatilgani haqida xabarlar tarqaldi.

Shuni ta’kidlash lozimki, O‘zbekiston Respublikasi Konstitutsiyasining 28-moddasiga asosan, jinoyat sodir etganlikda ayblanayotgan shaxs uning aybi qonunda nazarda tutilgan tartibda oshkora sud muhokamasi yo‘li bilan isbotlanmaguncha va sudning qonuniy kuchga kirgan hukmi bilan aniqlanmaguncha aybsiz deb hisoblanadi.

Shuningdek, O‘zbekiston Respublikasi Mehnat kodeksi talablariga ko‘ra, xodimni ishdan chetlashtirish qonunchilikka muvofiq, vakolatli davlat organlarining talabiga ko‘ra amalga oshirilishi belgilangan.

Bugungi kunga qadar O‘zbekiston Savdo-sanoat palatasiga huquqni muhofaza qilish organlaridan M.Omonboyevani ishdan chetlashtirish bo‘yicha talabnoma kelib tushmagan va M.Omonboyeva Palataning Navoiy viloyati hududiy boshqarmasi boshlig‘i lavozimida faoliyatini davom ettirmoqda.

Mazkur holat yuzasidan o‘rganish natijalari bo‘yicha qo‘shimcha axborot beriladi, – deyiladi xabarda.

• Navoiy
• savdo-sanoat