O‘zbekiston Favqulodda vaziyatlar vazirligi ijtimoiy tarmoqlarda Toshkent shahridagi sanoat omborlaridan birida sodir bo‘lgan kuchli portlash va yong‘inga samolyot halokati sabab bo‘lgani haqidagi xabarlarni rad etdi.

“Ayrim ijtimoiy tarmoqlarda Sergeli tumanidagi hodisa "Samolyot qulashi oqibatida sodir bo‘lgan" mazmunidagi feyk xabarlar tarqalmoqda. Bu mutlaqo haqiqatga to‘g‘ri kelmaydi”, – deyiladi FVV xabarida.

Qayd etilishicha, FVBga soat 02:43 da yong‘in sodir bo‘layotgani to‘g‘risida xabar kelib tushgan. Shunga ko‘ra, 16 ta yong‘in-qutqaruv ekipaji va 3 ta avtonarvon soat 02:48 da hodisa ro‘y bergan hududga yetib borgan. Hozirda yong‘inni o‘chirish ishlari amalga oshirilmoqda.

Ijtimoiy tarmoqlarda tarqalayotgan videolarda kuchli portlash ovozini eshitish mumkin. Yaqin atrofdagi xonadonlarga va savdo markazlariga jiddiy zarar yetgan. Xonadonlarga tez yordam mashinalari yetib borgan.

“Vaziyat to‘liq nazoratga olingan. Yong‘in soat 05:02 da qurshab olingan. FVV xodimlarining tezkor harakatlari natijasida yong‘in maydoni qisqartirilib borilmoqda. Voqea joyida dastlabki daqiqalardan boshlab FVV rahbariyati hamda kuch va vositalari, shuningdek, tegishli tashkilotlar xodimlari ish olib bormoqda. Yong‘in kelib chiqish sababini aniqlash maqsadida FVVning maxsus laboratoriyasi hodisa joyida ish olib bormoqda. Voqea joyida FVV rahbarligida shtab tashkil etilgan”, – deyiladi xabarda.

• FVV
• Sergeli
• yong‘in