Professional boksning yarim o‘rta vazn toifasi vakili, o‘zbekistonlik Shahram Gʻiyosovning navbatdagi raqibi va jang sanasi ma’lum bo‘ldi. Bu haqda bokschining o‘zi Instagram sahifasi orqali ma’lum qildi.

Qayd etilishicha, 30 yoshli charm qo‘lqop ustasi joriy yil 17-iyun kuni AQShda amerikalik Xerold Kalderonga qarshi WBA Eliminator jangida ringga ko‘tariladi.

“Assalomu alaykum, yurtdoshlar. Xudo xohlasa, jangim 17-iyun kuni AQShda bo‘lib o‘tadi. Raqibim amerikalik yengilmas sportchi – 27-0. Nasib qilsa, uni mag‘lub etganimdan keyin chempionlik jangiga bir qadam qoladi”, – deya yozib qoldirgan Gʻiyosov.

Ma’lumot uchun, Gʻiyosovning raqibi amerikalik Xarold Kalderon faoliyati davomida 27 ta jang o‘tkazgan va ularning barchasida g‘alaba qozongan. 18 ta jangda raqiblarini muddatidan avval mag‘lubiyatga uchratgan. Ushbu jang g‘olibi WBA chempionlik kamari uchun rasmiy va majburiy da’vogarga aylanadi.

Eslatib o‘tish mumkin, Gʻiyosov so‘nggi jangini o‘tgan yilning 8-may kuni Las-Vegas shahrida meksikalik Kristian Gomesga qarshi o‘tkazib, ochkolar hisobiga ko‘ra g‘alaba qozonib prof boksdagi 13-g‘alabasini qo‘lga kiritgan edi. Shu tariqa u IBF North American mintaqaviy chempionlik kamarini qo‘lga kiritgan

Joriy yilning 29-iyul kuni aynan ushbu vazn toifasida amerikalik ikki yengilmas jangchilar – afsonaviy chempion Terens Krouford (39-0-0) va Errol Spens (28-0-0) mutlaq jahon chempionligi uchun ringga ko‘tariladi. Agar Gʻiyosov Kalderonni mag‘lub etsa, bir yo‘la to‘rtta chempionlik kamari uchun (WBO, WBC, IBF, WBA) da’vogarlik qilishi mumkin.

• Boks
• Eksport