Shavkat Mirziyoyev 7-yanvar kuni Davlat xavfsizlik xizmatining harbiy ta’lim muassasalari faoliyati bilan tanishdi. Bu haqda Prezident matbuot xizmati xabar berdi.

Qayd etilishicha, Davlat xavfsizlik xizmatining Temurbeklar maktabi uchun Toshkent shahrining Yunusobod tumanida yangi bino qurilgan. Tashrif chog‘ida Prezidentga harbiy-akademik litseydagi o‘qitish tizimi haqida ma’lumot berilgan.

Davlat rahbari 2020-yil oktyabrda bu yerga kelganida hamda Xavfsizlik kengashining 2021-yilgi yig‘ilishida harbiy ta’limni takomillashtirish, yoshlarni O‘zbekiston tarixi va ajdodlar jasorati asosida vatanparvar etib tarbiyalash bo‘yicha ko‘rsatmalar bergan edi.

Temurbeklar maktabida o‘qish shunday tashkil etilgan. Buning uchun beshta kafedra: aniq fanlar, ijtimoiy-gumanitar fanlar, xorijiy tillar, psixologiya va tarbiya fanlari hamda kasbiy-amaliy fanlar kafedralari ochilgan. Ularga yuqori malakali pedagoglar ochiq tanlov asosida qabul qilingan.

Litsey tarix fani va xorijiy tillarga ixtisoslashgan. 2021/2022 o‘quv yilida 5 ming 600 nafar talabgordan eng bilimli 100 nafari saralab olingan. Bugungi kunda 220 nafar o‘quvchi saboq olmoqda.

Prezident lingafon, psixodiagnostika va ma’naviyat xonalarini kirib ko‘rgan. Amir Temur merosini o‘rganish markazida yoshlar bilan suhbatlashgan.

“Mana shunday ilg‘or maktabda o‘qiyotganingiz bilan sizlarni, ota-onalaringizni tabriklayman. Sizlar yangi O‘zbekistonning qanotisizlar. Bu qanotlar nima bilan kuchli bo‘ladi? Bilim bilan! Kamida ikki-uchta tilni, aniq fanlarni va tariximizni mukammal bilishingiz kerak. Mana, bu maktabda psixologiya fanini ham kiritdik, uniyam yaxshi o‘rganing. Sizlarda hamma imkoniyat bor”, — dedi Shavkat Mirziyoyev.

Shu yerda videokonferensiya orqali Toshkent, Nukus, Farg‘ona va Shahrisabz shaharlaridagi Temurbeklar maktabi o‘quvchilari bilan ham muloqot bo‘lgan. Ushbu maktablar o‘quvchilari o‘rtasida ma’naviyat bo‘yicha tanlov o‘tkazish, Temur tuzuklarining har bir tuzugi bo‘yicha ilmiy sharhlar yozish muhimligi ta’kidlangan.

Davlat rahbari litsey kutubxonasida ham bo‘lgan. U yerda kitob o‘qib o‘tirgan yigitlar ta’lim maskanida yaratilgan sharoitlar, o‘quvchilar o‘rtasidagi do‘stona muhit haqida so‘zlab bergan. Ular orasida Mehribonlik uylari tarbiyalanuvchilari ham bor.

“Mamlakatimizda hech bir bola e’tibordan chetda qolmaydi, hammasining rivojlanishi uchun sharoit yaratayapmiz. Faqat qaysi yosh o‘zini qiynab, vaqtini bekor o‘tkazmay, ko‘proq bilim olsa, kelajakda muvaffaqiyatga erishadi. Hamma buyuklik niyatdan keladi, mehnatdan keladi”, — dedi Prezident.

Litseyning o‘quv binosi, sport zali, yotoqxona, oshxona, tibbiy xizmat markazida eng zamonaviy sharoitlar yaratilgan. Shuningdek, majmua harbiy mashg‘ulotlar maydoni, stadion, suv havzasi, avtodrom va plasni o‘z ichiga olgan.

Prezident Amir Temur nomidagi Davlat xavfsizlik xizmati akademiyasidagi sharoitlarni ham ko‘zdan kechirgan.

• DXX
• Prezident
• Shavkat Mirziyoyev