Prezident Shavkat Mirziyoyev Olmaliq kon-metallurgiya kombinatining 3-mis boyitish fabrikasi qurilish jarayonini ko‘zdan kechirdi. Bu haqida Prezident matbuot xizmati xabar berdi.

Yangi fabrikada ruda omborlari, maydalash, yanchish va flotatsiya binolari, gidrometallurgiya sexi, ta’mirlash ustaxonalari, chiqindi xo‘jaligi va boshqa obyektlar bo‘ladi. Ish jarayoni zamonaviy uskunalar yordamida boshqariladi. Bu inson omilini kamaytirib, mahsulot sifati va ish xavfsizligini ta’minlashga xizmat qiladi.

Ta’kidlanishicha, kombinatning JORC kodeksi bo‘yicha baholangan mis resurslari 45 million tonnani, oltin resurslari esa 5 ming tonnadan ziyodni tashkil etadi. Bunga asoslanib, 2030 yilda mis ishlab chiqarish hajmini 515 ming tonnaga, oltinni 52 tonnaga, kumushni 343 tonnaga olib chiqish bo‘yicha konsepsiya tayyorlangan. Buning evaziga kombinatning yillik ishlab chiqarish hajmini 8 milliard dollarga yetkazish rejalashtirilgan.

Tashrif davomida kombinatni transformasiya qilish doirasida boshqaruv, ishlab chiqarish va logistika jarayonlarini raqamlashtirish, operasion samaradorlikni oshirish zarurligi ta’kidlangan.

“Eng asosiysi, kelgusi ikki yilda kombinatda zamonaviy boshqaruv tizimini joriy etib, uni davlat yordamisiz ishlay oladigan, dunyoning yetakchi metallurgiya kompaniyalaridan biriga aylantirish asosiy vazifa bo‘lishi kerak”, — degan Prezident.

Davlat rahbari 3-mis boyitish fabrikasini qurish bilan parallel ravishda 4-fabrikani ham loyihalashtirish muhimligini ta’kidlagan. Buning natijasida rudani qayta ishlash hajmi 160 million tonnaga yetib, 3 martaga ko‘payishi mumkin.

Qayd etilishicha, misni qayta ishlash va yuqori qo‘shilgan qiymatli mahsulotlar ishlab chiqarish bo‘yicha qiymati 76 million dollarlik 22 ta loyiha shakllantirilgan. Shuningdek, Prezidentning Janubiy Koreyaga davlat tashrifi chog‘ida Toshkent viloyatida Yarimo‘tkazgichlar va elektronika klasterini tashkil etishga kelishilgan.

Davlat rahbari shu boradagi ishlarni jadallashtirib, elektr texnikasi, energetika, avtomobil sanoati uchun talab yuqori bo‘lgan mahsulotlar ishlab chiqarish bo‘yicha ko‘rsatmalar bergan. Bundan tashqari, shu yerda mahalla raislari, hokim yordamchilari va yoshlar yetakchilari bilan ham muloqot bo‘lgan.

“Kombinatni, albatta, zo‘r qilamiz. Lekin avvalo odamlar rozi bo‘lishi kerak. Uyi yaxshi, suvi chuchuk, elektri o‘chmaydigan, ishi daromadli bo‘lishi lozim. Buning uchun mahallada qanday muammolar borligini, ularni hal qilib, odamlarga sharoit yaratish uchun nima kerakligini sizlar aytishingiz zarur. Shuning uchun ochiq muloqot qilsak, foydali bo‘ladi”, — degan Shavkat Mirziyoyev.

Hokim yordamchilari o‘zlari mas’ul bo‘lgan mahallada ishsizlikni kamaytirish, tadbirkorlik va tomorqachilikni rivojlantirish, yoshlarni sportga jalb etish bo‘yicha rejalarini so‘zlab bergan. Prezident ularga ishonch bildirib, takliflarini qo‘llab-quvvatlagan.

• Prezident