Bugun, 30-dekabr kuni Qozog‘istonning Almati shahrida shaxmatning rapid va blits yo‘nalishlari bo‘yicha o‘tkazilgan Jahon chempionati o‘z yakuniga yetdi.

Ikki kun davom etgan blits yo‘nalishidagi bahslarda erkaklar 21 ta ayollar esa 17 ta turda o‘zaro bahs olib bordilar. So‘nggi turda jahon shaxmat tojining amaldagi egasi norvegiyalik Magnus Karlsen rapid bo‘yicha sobiq jahon chempioni Nodirbek Abdusattorovni mag‘lubiyatga uchratdi va 16 ochko bilan jahon chempioni bo‘ldi. Karlsen, shuningdek, rapid yo‘nalishida ham Abdusattorovni taslim etgan va yakunda barcha raqiblarini ortda qoldirgan edi.

Amerikalik Xikaru Nakamura esa 15 ochko bilan qo‘shimcha ko‘rsatkichlarga ko‘ra ikkinchi o‘rinni egalladi. Shuncha ochko jamg‘argan armanistonlik grossmeyster Xaik Martirosyan esa kuchli uchlikka yakun yasab berdi.

O‘zbekistonlik shaxmatchilar orasida eng yaxshi natijani Nodirbek Abdusattorov qayd etdi. U 176 shaxmatchi orasida 13 ochko bilan qo‘shimcha ko‘rsatkichlarga ko‘ra 19-o‘rinni egalladi. Xuddi shuncha ochko jamg‘argan Jahongir Vohidov esa 22-pog‘onani band etdi.

21 imkoniyatdan 12,5 ochko to‘plagan Nodirbek Yuqubboyev va 12 ochkoga ega Muhiddin Madaminov 39 va 40-o‘rinda qayd etilgan. Bundan tashqari, Shamsiddin Vohidov, Javohir Sindorov, Muhammadzohid Suyarov va Humoyun Begmurodov singari o‘zbek shaxmatchilari ham musobaqada munoyaib ishtirok etishdi.

Ayollar o‘rtasidagi bellashuvlarda esa o‘zbekistonliklar orasidagi eng yaxshi natija Umida Omonovaga tegishli bo‘ldi. 16 yoshli shaxmatchi 17 imkoniyatdan 10,5 ochko jamg‘argan holda blits yo‘nalishida 16-o‘rinni egalladi. Shuningdek, 9 ochkoga ega Afruza Hamdamova va o‘zbekistonlik 1-ayol grossmeyster Nafisa Mo‘minova 37 va 44-pog‘onpdp qayd etilgan. Ushbu yo‘nalishda Jahon chempioni mezbonlar vakilasi Bibisora Assaubayeva bo‘ldi (17 imkoniyatdan 13 ochko).

• Jahon chempionati
• Magnus Karlsen
• Nodirbek Abdusattorov
• Shaxmat