AQSh va Isroil ko‘magida tashkil etilgan “G‘azo gumanitar yordami fondi” orqali faoliyat yuritayotgan gumanitar yordam markazlarida tarqatilayotgan un xaltalarida narkotik ta’sirga ega dori vositalari aniqlangan. Bu haqda Quds news network xabar berdi.

Ma’lum bo‘lishicha, to‘rt kishi AQSh-Isroil gumanitar yordam markazlaridan olingan un xaltalari ichida oksikodon turidagi narkotik modda saqlovchi tabletkalarni topgan.

“Bunday moddalarning un xaltalariga joylashtirilishi fuqarolar salomatligi va jamiyat tuzilmasiga qarshi yo‘naltirilgan jirkanch jinoyat hisoblanadi”, – deyiladi xabarda.

Shundan so‘ng, G‘azo hukumati Isroilni gumanitar yordam niqobi ostida falastinliklar orasida giyohvandlikni yoyishga urinishda ayblamoqda. Ularning so‘zlariga ko‘ra, bunday moddalarni “iflos urushning yumshoq vositasi” sifatida ishlatish harbiy jinoyat bo‘lib, xalqaro gumanitar huquq me’yorlariga zid.

Hukumat aholiga murojaat qilib, bunday markazlardan olingan yordam mahsulotlarini sinchiklab tekshirishga, shuningdek, har qanday shubhali moddalar topilganda zudlik bilan xabar berishga chaqirgan.

Bayonotda xalqaro hamjamiyatga murojaat qilinib, “o‘lim tuzog‘i”ga aylangan va yuzlab insonlarning o‘limiga sabab bo‘lgan bu kabi markazlarning faoliyatini to‘xtatish so‘ralgan.

• Falastin
• Giyohvandlik
• Gumanitar yordam
• Isroil