Avval xabar berilganidek, Toshkent shahrida oʻtkazilgan shaxmat boʻyicha “Rustam Qosimjonov turniri” bahslari poyoniga yetdi. Musobaqaning 8-turiga kelib gʻolib aniq boʻldi.

7-turda qora donalarda Nodirbek Abdusattorovni magʻlubiyatga uchratgan Javohir Sindorov 8-turda jahon chempioni Rustam Qosimjonov bilan durang oʻynadi. Ushbu natijasi orqali Sindorov 6,5 ochko bilan “Masters” musobaqasida muddatidan avval gʻoliblikka erishdi.

Eʼtiborlisi, boshqa bir oʻzbekistonlik shaxmatchi Shamsiddin Vohidov 5 ochko bilan 3-oʻrinni qoʻlga kiritdi.

Nodirbek Abdusattorov esa 4,5 ochko bilan 5-pogʻonadan joy oldi.

“Challengers” guruhida esa serbiyalik Aleksandr Injich 6,5 ochko bilan gʻoliblikni qoʻlga kiritdi.

Oʻzbekistonlik Ortiq Nigʻmatov esa qoʻshimcha koʻrsatkichlarga koʻra, vitse chempionga aylandi.

Musobaqaning gʻolib sovrindorlari mos ravishda Mastersʼda 12 000, 8 000, 6 000, Challengersʼda 4 000, 3 000 va 2 400 AQSh dollari miqdorida pul mukofotlari bilan taqdirlanishdi.

• Nodirbek Abdusattorov
• Shaxmat
• Toshkent