Har haftaning seshanba oqshomida chess.com platformasida dunyoning kuchli grossmeysterlari ishtirokida Titled Tuesday onlayn blits turniri o‘tkaziladi.

Musobaqada faqat rasmiy shaxmat unvoniga (GM, IM, FM va boshqalar) shaxmatchilar ishtirok etadi. Turnir formati shveytsarcha tizimda 11 raunddan iborat bo‘lib, har bir partiya 5 daqiqa vaqt nazorati bilan o‘ynaladi. 

Kechagi turnirda o‘zbekistonliklar orasida eng yaxshi natijani Javohir Sindarov qayd etdi. Grossmeyster 5-turgacha yuz foizlik natija bilan peshqadamlik qildi. Ammo keyin vaqti tushib ketganligi uchun ikki mag‘lubiyatni qabul qilib oldi. 

Shunga qaramay, so‘nggi turlarni o‘z foydasiga hal qilib, 11 imkoniyatdan 9 ochko to‘pladi. So‘nggi turda qora donalarda o‘ynaganiga qaramay, jahon tojdori Magnus Karlsenni ham mag‘lub etishni uddaladi. Javohir faqat qo‘shimcha ko‘rsatkichlarga ko‘ra 6-o‘rinni egalladi. Sovrinli uchinchi o‘rinni band etgan Denis Lazovik ham Sindarov singari 9 ochko jamg‘ardi. Turnir chempionligi 9,5 ochko to‘plagan fransiyalik Maksim Vashe-Lagravga nasib etdi. Shuncha ochkoga ega polshalik Yan-Krishtof Duda esa ikkinchi pog‘onadan joy oldi. 

Ma’lumot uchun, Javohir Sindarov ikki hafta avval ushbu turnirda 9,5 ochko jamg‘arib, chempion bo‘lgandi.

• Shaxmat
• turnir