Bugun, 20-may kuni Toshkent shahrida Shanxay Hamkorlik Tashkilotiga aʼzo davlatlarning jismoniy tarbiya va sportga masʼul vazirlik hamda idoralari rahbarlarining ilk yigʻilishi boʻlib oʻtdi.

Sportni rivojlantirish vazirligida tashkil etilgan yigʻilishda ShHT Bosh kotibi Chjan Min ham ishtirok etdi.

Shuningdek, mazkur yigʻilishda Oʻzbekiston Respublikasi Sportni rivojlantirish vaziri A.Ikramov, Rossiya Federatsiyasi sport vaziri O.Matisin, Hindistonning Yoshlar va sport masalalari boʻyicha faxriy vaziri A.Singx, Qozogʻiston madaniyat va sport vaziri D.Abayev, Qirgʻiziston madaniyat, axborot, sport va yoshlar siyosati vaziri A.Jumankulov, Tojikiston Hukumati qoshidagi Yoshlar va sport qoʻmitasi raisi oʻrinbosari P.Sobirzoda, Pokiston Islom Respublikasi Sport kengashi prezidenti Ehsan ur-Rahmanlar ham qatnashdi.

Keltirilishicha, pandemik vaziyat jiddiy tus olayotganligi bois Xitoy delegatsiyasi Oʻzbekistonga kela olmadi.

Tadbirda XXR nomidan Davlat sport bosh boshqarmasi direktori, Xitoy Milliy olimpiya qoʻmitasi prezidenti Chjunven Gou onlayn tarzda ishtirok etdi.

Yigʻilishni Sportni rivojlantirish vaziri Adxam Ikramov kirish soʻzi bilan ocharkan, avvalo barcha delegatsiyalarning rahbarlariga tashrif uchun minnatdorlik bildirdi.

Shuningdek, yigʻilishda Oʻzbekiston Milliy olimpiya qoʻmitasi Bosh kotibi Oybek Kasimov Toshkent-2025 IV yoshlar Osiyo oʻyinlariga tayyorgarlik jarayonlarining borishi hamda ushbu musobaqa bahonasida barpo etilayotgan Olimpiya shaharchasining qurilishi boʻyicha taqdimot qildi.

Yigʻilishda tomonlar sport industriyasining bugungi holati hamda dunyoda davom etayotgan pandemik vaziyat faolligi sharoitida jismoniy tarbiya va sportni rivojlantirish, ShHTga aʼzo davlatlarda sogʻlom turmush tarzini yana-da keng targʻib qilish boʻyicha koʻrilayotgan chora-tadbirlarni koʻrib chiqishdi va oʻz tajribalari bilan oʻrtoqlashdi.

Shuningdek, muhokamalar jarayonida tomonlar ShHTga aʼzo davlatlar oʻrtasida sportchilarni tayyorlash, aholi, xususan, yoshlarni sport va sogʻlom turmush tarziga jalb etish borasidagi hamkorlikni yana-da rivojlantirish muhimligi qayd etishdi.

ShHTga aʼzo davlatlarda aholining barcha qatlami uchun sport bilan shugʻullanish imkoniyatini oshirish, sport anjomlari, kiyim-kechak va jihozlar ishlab chiqarish boʻyicha qoʻshma loyihalarni amalga oshirish zarurligi taʼkidlandi.

Yigʻilishda tomonlar Kunmin (XXR) va Issiqkoʻl viloyatida (Qirgʻiziston Respublikasi) ShHT marafonlarining muntazam oʻtkazilishini olqishladi.

Oʻz navbatida tashkilotga aʼzo davlatlar delegatsiyalarining rahbarlari shu yil 27-mart kuni oʻtkazilgan ShHT Toshkent yarim marafoni yuqori saviyada tashkil etilganligini eʼtirof etishdi.

Tomonlar ShHTga aʼzo davlatlarning jismoniy tarbiya va sportni rivojlantirishga masʼul vazirlik va idoralari rahbarlarining navbatdagi yigʻilishini Hindistonda oʻtkazish boʻyicha kelishib oldilar.

Shuning bilan ShHTga aʼzo davlatlarning jismoniy tarbiya va sportni rivojlantirishga masʼul vazirlik va idoralari rahbarlarining ilk yigʻilishi oʻz ishini yakunladi.

• O‘zbekiston
• ShHT