Shvetsiya tashqi ishlar vaziri Ann Linde mamlakatning Shimoliy Atlantika alyansi (NATO)ga kirishi haqidagi arizani imzoladi.

“Bu, biz Shvetsiya uchun eng yaxshi qadam deb hisoblayotgan jiddiy voqea sifatida qabul qilinadi”, – deydi vazir.

Uning so‘zlariga ko‘ra, endi Shvetsiya arizasi Finlandiya arizasi bilan birga topshiriladi. Finlandiya parlamentining tarixiy ovoz berish jarayoni 17 may kuni kechqurun bo‘lib o‘tishi kutilmoqda.

Bir kun avval Shvetsiya hukumati mamlakat taxminan 200 yillik betaraflikdan so‘ng NATOga aʼzo bo‘lish uchun ariza berish haqida rasman qaror qilgan edi.

Shuningdek, Finlandiya hukumati ham bu boradagi qarorni 15 may kuni qabul qilgan.

“Shvetsiyaning Bryusseldagi elchisi Shvetsiya arizasini yaqin kunlarda NATO Bosh kotibi Yens Stoltenbergga taqdim etadi”, – deya xabar beradi Sveriges Radio.

Maʼlumot uchun, Rossiya prezidenti Vladimir Putin 16 may kuni KXSHTning navbatdagi sammitida NATOning kengayishi sunʼiy amalga oshirilayotganini iddao qilib, Finlandiya va Shvetsiyaning NATOga qo‘shilishi Rossiya uchun xavf tug‘dirmasligini, biroq bu mamlakatlarda harbiy infratuzilmaning kengaytirilishiga Rossiya o‘z javobini qaytarshini aytgan edi.

Shu bilan birga, Putinning matbuot kotibi Dmitriy Peskov Moskva Finlandiya va Shvetsiyaning NATOga qo‘shilishi Rossiya xavfsizligi nuqtai nazaridan qanday oqibatlarga olib kelishini diqqat bilan kuzatib borishini aytgan.

Eslatib o‘tamiz, avvalroq Shvetsiya va Finlandiya NATOga kirish istagini bildirgan va ular o‘z qarorlarini harbiy tashkilotga aʼzolik ularning xavfsizlik darajasini oshirishi bilan izohlagan edi.

• Finlandiya
• NATO
• Rossiya
• Shvetsiya