Avval xabar berilganidek, bugun Sirdaryo viloyati hokimi Gʻofurjon Mirzayevning viloyatni ijtimoiy-iqtisodiy rivojlantirish boʻyicha 2021-yil yakunlari hamda 2022-yildagi dolzarb vazifalar toʻgʻrisida xalqqa murojaati boʻlib oʻtdi. 

Murojaat doirasida viloyat hokimi 2022-yil viloyatda amalga oshiriladigan muhim vazifalarga ham toʻxtatilib oʻtdi.

Qayd etilishicha, Energetika sohasida 2,4 milliard dollarlik loyihalar doirasida, quvvati 3 ming 220 Mega-vatt boʻlgan elektr stansiyalari barpo etiladi.

Jumladan, Saudiya Arabistoni “Akva Paur” korxonasining 1 milliard dollar investitsiyasi hisobiga, 1,5 ming Mega-vattli elektr stansiya ishga tushirilib, aholi va korxonalar uzluksiz elektr energiyasi bilan taʼminlanadi.

Maʼlum qilinishicha, kelgusi besh yilda 10 ming xonadonli uy-joylar quriladi. Shundan, 1,5 mingdan ziyod uy-joy kam taʼminlangan oilalarga ajratilib, ularga ipoteka krediti boʻyicha 60 milliard soʻmlik subsidiyalar beriladi.

Jumladan, ogʻir turmush sharoitida yashayotgan 800 nafar ayollarga subsidiya ajratiladi, 450 nafariga boshlangʻich badal puli toʻlab beriladi, 120 nafari bepul uy-joy bilan taʼminlanadi.

Shuningdek, Guliston shahrining eski dehqon bozori oʻrnidagi 42 gektar maydonda “Guliston citi” barpo etiladi.

Bu yerda, 1 ming 700 xonadonli 16 qavatli turar-joylar, umumtaʼlim va biznes maktablari, 2 ta bolalar bogʻchasi, zamonaviy klinika, madaniyat markazi va mehmonxona qurilishi koʻzda tutilgan.

• Sirdaryo
• hokim