Jizzax viloyatidagi qurilish sohasida yuzaga chiqqan mashmashalar ortidan viloyat hokimining sobiq o‘rinbosari Akram Rahmonqulov va uning bir qator qarindoshlari hamda boshqa shaxslarga nisbatan jinoyat ishi qo‘zg‘atilgan edi.

Toshkent viloyat sudining jinoyat ishlari bo‘yicha sudyasi S.Ashirmatov raisligida ko‘rib chiqilgan mazkur jinoyat ishi yakunlandi.

Unga ko‘ra, Akram Rahmonkulov Jinoyat kodeksining 167-moddasi 3-qismi “a, v” bandlari (o‘zlashtirish yoki rastrata yo‘li bilan talon-toroj qilish), 184-moddasi 3-qismi (soliqlar yoki boshqa majburiy to‘lovlarni to‘lashdan bo‘yin tovlash) va qator savdo yoki xizmat ko‘rsatish qoidalarini buzish, hokimiyat yoki mansab vakolatini suiiste’mol qilish, mansabga sovuqqonlik bilan qarash, jinoiy faoliyatdan olingan daromadlarni legallashtirish kabilarni nazarda tutuvchi jinoyatlarni sodir qilganlikda aybdor deb topilib, unga 2 yil muddatga mansabdorlik va moddiy javobgarlik lavozimlarida ishlash huquqidan mahrum qilinib, 7 yil 6 oy ozodlikdan mahrum qilish jazosi hamda BHMning 500 baravari miqdorida ya’ni, 111 500 000 so‘m jarima jazosi tayinlandi.

Shuningdek, sud hukmi bilan Akbar Rahmonqulov (“J-Quruvchi” MCHJ direktori), Alisher Rahmonqulov (“Ravon Yo'l Invest” MCHJ, “Sogdiana pipeplast” MCHJ va “Jizzax savdo lyuks” MCHJlar direktori), Abror Rahmonqulov (“Zenatkor Sayhan Kon Sanoat” MCHJ direktori), Adham Rahmonqulov (“Zenatkor temir beton buyumlari” MCHJ direktori) va yana 20 dan ortiq shaxslarga turli jazolar tayinlandi.

Ushbu hukm ustidan sudlanuvchilar, ularning himoyachilari va boshqa taraflar apellyasiya tartibida shikoyat berishga, prokuror va uning o‘rinbosari esa, protest bildirishga haqli ekanligi tushuntirildi.

• Jinoyat
• Jizzax
• Sud
• hokim