Surxondaryo viloyati, Termiz shahrida yashovchi 23 yoshli M.M. IIOga murojaat qilib, noma’lum shaxs tomonidan 27 million so‘m firibgarlik yo‘li bilan yechib olinganini ma’lum qilgan.

Qayd etilishicha, tezkor-qidiruv tadbirlaridan so‘ng bu Surxondaryo viloyati, Jarqo‘rg‘on tumanida yashovchi 28 yoshli K.B.ning harakati ekanligi ma’lum bo‘lgan.

Aniqlanishicha, K.B. Telegram messenjeri orqali turli xil mazmundagi yolg‘on e’lonlar ostida soxta havola jo‘natib kelgan. Aldovlarga ishonib, soxta havolaga bank kartasi ma’lumotlarini kiritgan fuqarolarning bank kartalari boshqaruvini qo‘lga kiritgan. Natijada ular hisobidagi pullarni o‘zining foydalanuvida bo‘lgan bank kartasiga o‘tkazib olgan.

Mazkur holat yuzasidan O‘zbekiston Respublikasi Jinoyat kodeksining 168-moddasi 3-qismi “b”, “g” bandi bilan jinoyat ishi qo‘zg‘atildi. K.B.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.

Qonunga muvofiq, O‘zbekiston Respublikasi Jinoyat kodeksining 168-moddasi 3-qismi “b”, “g” bandidagi jinoiy xatti-harakatlar uchun 5-yildan 8-yilgacha ozodlikdan mahrum qilish jazosi nazarda tutilgan.

• Bank karta
• Firibgarlik
• Jinoyat