Surxondaryo viloyatining Oltinsoy tumanida avtomobil yo’lini kengaytirish hamda shu yo’ldagi ko’prikni rekonstruksiya qilish maqsadida ko’p yillik manzarali daraxtlar tuman Ekologiya bo’limi davlat inspektorlarining qarshiliklariga qaramasdan noqonuniy ravishda kesib tashlangan. Holat bo‘yicha jinoyat ishi qo‘zg‘atilgan.

Oltinsoy tumanining “Mirshodi” mahallasi hududidan o‘tuvchi, Oltinsoyni Denov tumani bilan bog‘lovchi avtomobil yo‘lini kengaytirish, ushbu yo‘ldagi “Qora ariq” ko’prigini rekonstruksiya qilish maqsadida yo‘l yoqalarida mavjud bo‘lgan ko‘p yillik daraxtlarni kesib olish uchun tuman hokimligining ma’sul xodimi tuman Ekologiya bo‘limidan og‘zaki tarzda ruxsat so‘ragan.

Oltinsoy tuman Ekologiya bo‘limi xodimlari Furqat Safarov, Oybek Xo‘shboqovlar tomonidan holat joyiga borib o‘rganilib, hududda mavjud bo‘lgan daraxtlar xatlovdan o‘tkaziladi va daraxtlarni noqonuniy ravishda kesish amaldagi qonunchilikka binoan javobgarlikka tortilishi tushuntirib o‘tiladi.

Shunga qaramasdan, noma’lum shaxslar tomonidan kechqurun hududda mavjud bo‘lgan, o‘suvchanligini yo‘qotmagan 61 qimmatbaho navli daraxtlarni (2 tup chinor, 54 tup virgin archasi) manzarali daraxtlarni, 6 tup kam qimmatli daraxtlarni (2 tup terak, 4 tup tol) tag qismi bilan kesib tashlangan.

Surxondaryo viloyati Ekologiya boshqarmasining tezkor guruhi shu kuning o‘zida holat sodir etilgan joyga yetib borib, holat yuzasidan bayonnoma tuzgan.

Mutaxassislarning hisob-kitoblariga ko‘ra ushbu noqonuniy harakat oqibatida o‘simlik dunyosiga 293 million 700 ming so‘m zarar yetkazilgan.

Mazkur holat bo‘yicha viloyat Prokuraturasi tomonidan jinoyat ishi qo‘zg‘atilgan bo‘lib, hozirgi kunda tergovga qadar surishtiruv ishlari olib borilmoqda.

• Ekologiya
• Surxondaryo
• daraxt