Surxondaryoda ikkita qadimiy yodgorlikka 227,4 mlrd so‘m zarar yetdi. “Hayvontepa” va “Qorabog‘tepa-1” arxeologik yodgorliklarining ayrim qismlari buzib yuborilgan. Hozirda ushbu holatlar yuzasidan jinoyat ishi qo‘zg‘atilgan. Bu haqda Bosh prokuratura matbuot xizmati xabar berdi.

Shuningdek, Denov tumanidagi V-VII asrlarga oid “Qorabog‘tepa-1” arxeologik yodgorligining 585 metr kub maydoni ayrim fuqarolar tomonidan uy-joy qurish maqsadida tekislab yuborilgan. Oqibatda yodgorlikka 19,3 milliard so‘mlik zarar yetkazilgan.

Bundan tashqari, Sariosiyo tumanida esa miloddan avvalgi III-I asrlarga oid “Hayvontepa” arxeologiya yodgorligining 3500 metr kub maydoni xususiy korxona tomonidan issiqxona qurish maqsadida buzib yuborilgan va yodgorlikka 208,1 mlrd so‘mlik zarar yetkazilgan.

Ma’lumot uchun, mazkur holatlar qonunchilikka asosan og‘ir jinoyat hisoblanib, aybdor shaxslarga nisbatan 7 yilgacha ozodlikdan mahrum qilish jazosi qo‘llanilishi mumkin.

• Surxondaryo