Surxondaryo viloyatida kredit mablag‘larini o‘zlashtirish bo‘yicha ikkita holat aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamentning matbuot xizmati xabar berdi.

Qayd etilishicha, Bosh prokuratura huzuridagi Departamentning Surxondaryo viloyati Boysun tuman bo‘limi tomonidan tergovga qadar tekshiruv o‘tkazilgan. Ushbu tadbir davomida, “U.” kichik korxonasi rahbari N.A. hududiy tijorat banki filialidan tikuvchilikni rivojlantirish uchun tikuv mashinasi, asbob uskuna va xom ashyolar sotib olish uchun ajratilgan kredit mablag‘ini “B.T.” kichik korxonasiga o‘tkazish orqali boshqa maqsadlarda sarflab, jami 428,4 mln so‘mni o‘zlashtirish yo‘li bilan talon-toroj qilganligi aniqlangan.

Shu kabi, Boysun tuman bo‘limi tomonidan o‘tkazilgan yana bir tergovga qadar tekshiruvda, fuqaro O‘.I. va “M.O‘.” fermer xo‘jaligi rahbari O‘.M. 6 nafar fuqaroning xabardorligisiz ta’minotchi korxonalar hisob raqamiga 174 mln so‘m kredit mablag‘ini o‘tkazishib, fuqarolarga chorva mollarni olib bermasdan, o‘zgalar mulkini firibgarlik yo‘li bilan qo‘lga kiritganliklari aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

• Akkreditatsiya
• Surxondaryo