Surxondaryo viloyatida erkak Qizil kitobga kiritilgan sirtlonni o‘ldirganligi aks etgan suratlar tarqaldi.

Mazkur holat Surxondaryo viloyati ekologiya, atrof-muhitni muhofaza qilish va iqlim o‘zgarishi boshqarmasi xodimlari va Milliy gvardiya xodimlari tomonidan o‘rganilgan.

Ma’lum qilinishicha, voqea 2023-yilning oktyabr oyi oxiri-noyabr oyi boshlarida Surxondaryo viloyati Sho‘rchi tumani “Obodon” mahallasidagi “Takatosh” massivida fuqaro Sh.X. tomonidan sodir etilgan.

E’tiborlisi, mazkur holat natijasida tabiatga 1 mlrd 60 ming so‘m miqdorida zarar yetkazilgan.

O‘rganish natijalariga ko‘ra, bir bosh noma’lum hayvonning suyaklari topilib, ular qaysi hayvon turiga tegishliligi borasida ilmiy xulosa olish maqsadida tegishli tashkilotlarga jo‘natilgan.

Ma’lumot uchun, JKning 202-moddasiga ko‘ra, Qizil kitobga kiritilgan hayvonlarni nobud qilish eng kam oylik ish haqining 400 baravaridan 600 baravarigacha miqdorda jarima, 3-yildan 5-yilgacha ozodlikni cheklash yoki 3-yildan 5-yilgacha ozodlikdan mahrum qilish bilan jazolanadi.

• Surxondaryo