Surxondaryoda shantaj yo‘li bilan tadbirkorlardan pul olib yurgan soxta jurnalist aniqlandi. Bu haqida "Yangi davr" dasturida xabar berildi.

Qayd etilishicha, “jurnalist” o‘zini Respublikadagi yetakchi telekanallar muxbiri sifatida tanishtirib yurgan va shantaj yo‘li bilan odamlardan pul olgan. Denov tumanidagi tadbirkor huquq-tartibot organlariga bu haqida murojaat qilgan.

Shundan so‘ng Davlat xavfsizlik xizmati Iqtisodiy jinoyatlarga qarshi kurashish departamentining hududiy boshqarmalari tomonidan tezkor tadbir o‘tkazilgan. Tadbir davomida Denov tumanidagi “Nihol studio” jurnalisti bo‘lgan ayol “Agar pul bersangiz, sizni maqtayman. Bermasangiz tanqid qilaman” deb tadbirkorlarni qo‘rqitib pullarini olib yurgani aniqlangan. U maqtovga oid lavhaning har bir daqiqasi uchun 200 ming so‘m talab qilgan.

"Ko‘rsatuvning efir haqi uchun pul so‘raganman. Lavha ijtimoiy tarmoqlar orqali e’lon qilingan. Ish boshlaganimga 2-3 oy bo‘lib qoldi. Ma’lumotim oliy", – deydi u

Shuningdek, “jurnalist” tadbirkorlik subyektlari, fermer xo‘jaliklari, maktabgacha ta’lim tashkilotlari va ko‘plab idoralar faoliyatini tasvirga olib, tanqidiy lavhalar tayyorlagan. Ijtimoiy tarmoqlar va televideniye orqali ko‘rsatish bilan po‘pisa qilib, agar kelishilgan pul berilsa, tasvirlarni o‘chirib tashlashini aytib tovlamachilik qilib yurgan.

• Jurnalistika
• Surxondaryo