Davlat xavfsizlik xizmati Surxondaryo viloyati boʻyicha boshqarmasi va Ichki ishlar boshqarmasi bilan hamkorlikda viloyatning Termiz shahri va Termiz tumanlarida yashovchi, xalqaro terrorchilik guruhlar faoliyatini qoʻllab-quvvatlab kelgan bir nechta shaxslarning faoliyatiga chek qoʻyildi.

Qayd etilishicha, ushbu shaxslarning aksariyati Termiz shahridagi bozorlardan birida savdo faoliyati bilan shugʻullanib, Telegram messenjerida virtual guruh tashkil qilishgan.

Unda terrorchilik tashkilotlari gʻoyalarini targʻib qilib, oʻzlarining Turkiya, Suriya va Misr davlatlaridagi gʻoyadoshlarini moliyaviy tomondan qoʻllab-quvvatlash maqsadida, plastik karta rasmiylashtirgan hamda unda yigʻilgan pul mablagʻlarini koʻrsatilgan hududlarga yuborish bilan shugʻullanib kelishgan.

Keltirilishicha, qoʻlga olinganlar orasida kelgusida Suriya hududiga borib, jangarilar safiga qoʻshilishni rejalashtirgan fuqarolar ham mavjud.

Guruh aʼzolarining xonadonlarida oʻtkazilgan tintuv tergov harakati jarayonida ekstremistik va terrorchilik mazmunidagi ashyoviy dalillar protsessual tartibda rasmiylashtirib olingan.

Maʼlum qilinishicha, hozirda qoʻlga olingan shaxslarga nisbatan Jinoyat kodeksining tegishli moddalari boʻyicha jinoyat ishi qoʻzgʻatilib, tergov harakatlari olib borilmoqda.

• DXX