Surxondaryo viloyatining Denov tumani “Elobod” mahallasida yashovchi kelin turmush o‘rtog‘ining onasiga “yaxshi qaramagani” uchun qaynog‘asi tomonidan kaltaklandi. Bu haqda Surxondaryo viloyati IIB matbuot xizmati xabar berdi.

Hodisa joriy yilning 21-aprel kuni soat 17:30 larda sodir bo‘lgan. Fuqaro Q.Y. shu mahallada yashovchi qarindoshi J.M. ismli ayol bilan ilgaridan davom etib kelayotgan oilaviy nizolari sababli fuqaro J.M.ning yashash uyida o‘zaro janjallashib qolishi natijasida ayol tanasining turli joylariga qo‘llari bilan urib, tan jarohati yetkazgan.

Denov tumani STEning dastlabki ma’lumotnomasiga ko‘ra, “O‘rtacha og‘ir tan jarohatlari” deb baholanishi ko‘rsatilgan.

Mazkur holat yuzasidan, Denov tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 105- moddasi 2-qismi “g” bandi bilan jinoyat ishi qo‘zg‘atilib, tergov harakatlari olib borilmoqda. Gumonlanuvchi shaxs O‘zbekiston Respublikasi Jinoyat protsessual kodeksining 221-moddasi tartibida ushlangan. Tergov harakatlari Surxondaryo viloyati Ichki ishlar boshqarmasi tomonidan nazoratga olingan.

• IIB
• Surxondaryo
• Xabardor.uz