Joriy yil 14-dekabr kuni Namangan viloyatida yashovchi 27 yoshli A.I. Yakkasaroy tuman IIO FMB boshlig‘i nomiga ariza bilan murojaat qilib, unda 2021-yil 11-dekabr kuni 21 yoshli J.Z. uni sha’niga putur yetkazadigan foto va video tasvirlarni Instagram ijtimoiy tarmog‘iga joylashtirmasligi evaziga 5 mln. so‘m miqdoridagi pullarni talab qilib kelayotganligini ma’lum qilib, unga nisbatan qonuniy chora ko‘rishni so‘ragan.

O‘sha kuni A.I.,ning arizasi bo‘yicha o‘tkazilgan tezkor tadbir davomida J.Z. Yakkasaroy tumani Sh.Rustaveli ko‘chasida joylashgan supermarket oldida A.I.,dan 100 AQSh dollari va 500 ming so‘m miqdoridagi pullarni olayotgan vaqtida tezkor xodimlar tomonidan ashyoviy dalillar bilan ushlangan.

Mazkur holat yuzasidan Yakkasaroy tumani IIO FMB huzuridagi Tergov bo‘limi tomonidan J.Z.,ga nisbatan Jinoyat kodeksning 165-moddasi 1-qismi (tovlamachilik) bilan jinoyat ishi qo‘zg‘atilib, J.Z. protsessual tartibda ushlangan.

Dastlabki tergov jarayonida aniqlanishicha, J.Z. oldin xam A.I.ning sha’niga putur yetkazadigan foto va video tasvirlarni Instagram ijtimoiy tarmog‘iga joylashtirmasligi evaziga A.I.,dan tovlamachilik yo‘li bilan 4 mln. so‘m miqdoridagi pullarni olganligi, bundan tashqari uning boshqa xarajatlari uchun pul to‘lab kelganligi aniqlangan.

Hozirda tergov harakatlari olib borilmoqda.

• Jinoyat
• Toshkent