Joriy yilning 13-noyabr kuni Moskva viloyatining Solnechnogorsk shaharchasi Pribrejnaya ko‘chasida joylashgan quruvchilarning vaqtincha turar joyida yong‘in yuz bergandi. O‘shanda voqea sababli 2 kishi jarohat olgan va 4 kishi vafot etgan. Tashqi mehnat migratsiyasi agentligi shu voqeadan so‘ng Youtube ijtimoiy tarmog‘ida Moskva viloyatida sodir bo‘lgan yong‘in oqibatida halok bo‘lgan O‘zbekiston fuqarolari jasadlarini Vatanga qaytarishda muammolar yuzaga kelayotgani hamda buning uchun mablag‘ yig‘ilayotgani haqida murojaat yuzasidan bayonot berdi.

Qayd etilishicha, vafot etganlarning barchasi O‘zbekiston fuqarolari, ammo, jasadlarni Vatanga qaytarish uchun qaysi jasad qaysi shaxsga tegishli ekanini aniqlash talab etiladi.

Agentlikning xabar berishicha, Rossiya Federatsiyasi qonunchiligiga ko‘ra, davlat tashkiloti tomonidan o‘tkaziladigan DNK tekshiruvi natijalari olingach, ya’ni, har bir jasadning shaxsi aniqlangandan keyin tergov qo‘mitasi ruxsati bilan jasadlarni olib chiqib ketishning imkoni bo‘ladi.

Shu bois, agentlik marhumlarning qarindoshlaridan chet davlat qonunlari, tartib qoidalarini e’tiborga olishlarini hamda ijtimoiy tarmoq faollaridan ularning ayni paytdagi hissiyotlaridan foydalanib, ommani chalg‘itish, mablag‘ yig‘ishga qaratilgan chiqishlar qilmasliklarini so‘ramoqda.

• Rossiya
• o‘zbek
• yong‘in