Hindistonning Kalkutta shahrida o‘tkazilayotgan shaxmat bo‘yicha “Tata Steel Chess India” turnirining so‘nggi kunida blits bahslari davom ettiriladi va musobaqa yakuniga yetadi.

Kecha turnirda blits yo‘nalishining dastlabki 9 ta turi o‘tkazilib, unda Nodirbek Abdusattorov 3 g‘alaba, 2 durang va 4 mag‘lubiyat bilan 4 ochko jamg‘argan holda 6-o‘rinni egallab turibdi.

Rapid turnirida katta farq bilan 1-o‘rinni egallagan jahon reytingi peshqadami Magnus Karlsen 6,5 ochko bilan blitsda ham peshqadamlik qilyapti.

Ayni damda “Tata Steel Chess India” turnirining ikkinchi kungi blits bahslari start olgan. Bugunning o‘zida grossmeysterlar qolgan 9 ta turda hisob-kitob qilishadi.

Nodirbek 1-turda FIDE bayrog‘i ostida o‘ynayotgan rossiyalik Daniil Dubovga qarshi bahs olib boradi. Ular o‘rtasidagi rapid uchrashuvida ham, kecha o‘tkazilgan ilk kungi blitsda ham durang natija qayd etilgandi.

Nodirbek Abdusattorov va Magnus Karlsen o‘rtasidagi blits partiyasi ham 4-turga to‘g‘ri kelmoqda va taxminan soat 14:30 da boshlanadi.

• Nodirbek Abdusattorov
• Shaxmat