Surxondaryo viloyati Termiz shahrining Imom Termiziy xalqaro ilmiy-tadqiqot markazida “Hadislar bilimdoni” ko‘rik-tanlovining mamlakat bosqichi yakunlandi.

Prezidentning 2024-yil 15-avgustdagi “Imom Termiziy tavalludining 1200 yilligini keng nishonlash to‘g‘risida”gi qarori ijrosi doirasida tashkil etilgan tanlovda O‘zbekistondagi 10 ta o‘rta maxsus islom ta’lim muassasasining talabalari o‘z bilimlarini sinovdan o‘tkazdi.

Ko‘rik-tanlov Qur’oni karim tilovati bilan boshlandi. O‘zbekiston Musulmonlari idorasi raisi o‘rinbosari, Imom Buxoriy nomidagi Toshkent islom instituti rektori Muhammadolim Muhammadsiddiqov, Imom Termiziy o‘rta maxsus islom ta’lim muassasasi direktori Kamol Islomov, O‘zbekiston musulmonlari idorasining Surxondaryo viloyati bosh imom xatibi Aliakbar Sayfutdinovlar mamlakatimizda muqaddas islom dini ilmlari rivojiga beqiyos hissa qo‘shgan buyuk ajdodlarimiz va ularning ulkan ilmiy merosini yanada chuqur o‘rganib, xalqimiz hamda jahon jamoatchiligi o‘rtasida keng targ‘ib qilishga alohida e’tibor qaratilayotganini ta’kidladi.

Joriy yilda yurtimizda buyuk alloma Imom Termiziy tavalludining 1200 yilligi keng nishonlanayotgani va shu munosabat bilan Termiz shahrida “Imom Termiziy ilmiy merosining islom sivilizatsiyasida tutgan o‘rni” mavzusiga bag‘ishlab tashkil etilgan xalqaro ilmiy-amaliy konferensiyaning ahamiyati to‘g‘risida fikr yuritildi.

Ko‘rik-tanlovda ishtirokchilar to‘rtta shart bo‘yicha bellashib, dastlab buyuk muhaddislarning hayoti va ilmiy faoliyati to‘g‘risidagi savolga javob berdi. Keyingi shartlar hadis kitoblari va hadis istilohlariga oid savollarning javobini aytish bilan davom etdi. Imom Termiziyning “Sunani Termiziy” asaridan keltirilgan hadislarni yoddan aytishdi.

O‘z davrida muqaddas islom dini rivojiga munosib hissa qo‘shgan buyuk allomalarimizning hayoti, ijodi va ilmiy faoliyati, dunyo xalqlarining bebaho mulkiga aylangan nodir asarlarining mazmun-mohiyati, qadr-qimmati o‘z ifodasini topgan tanlov ishtirokchilari bilimini nufuzli hakamlar hay’ati xolisona baholab bordi.

Tanlov yakunida “Jo‘ybori Kalon” ayol-qizlar o‘rta maxsus islom ta’lim muassasasi talabasi Munira Islomova faxrli birinchi o‘rinni egalladi. Ikkinchi Imom Termiziy o‘rta maxsus islom ta’lim muassasasi tolibi Xabib Yarashevga, uchinchi o‘rin “Muhammad al-Beruniy” o‘rta maxsus islom ta’lim muassasasi tolibi Muhammadsodiq Toirjonovga nasib etdi.

G‘oliblar diplom va O‘zbekiston Musulmonlari idorasi, Surxondaryo viloyati hokimligi hamda “Vaqf” xayriya jamoat fondining esdalik sovg‘alari bilan taqdirlandi.

• Musulmon
• Surxondaryo
• Termiz