Tesla kompaniyasi elektromobillardagi ikkita nosozlik tufayli AQShdagi 475 mingdan ortiq elektromobilni qaytarib olishga qaror qildi.

Qayd etilishicha, Tesla qaytarib olishni rejalashtirayotgan elektromobillarning umumiy soni kompaniyaning 2020-yilda mijozlarga yetkazib bergan mashinalarining umumiy miqdori — 499 550 donadan bir oz kamroq.

Nashrga ko‘ra, 356 309 ta elektromobilda qayd etilgan muammodan biri — orqa ko‘rish kamerasidagi defekt. Ushbu muammo 2017-2020 yillarda ishlab chiqarilgan Tesla Model 3’da aniqlangan.

“Orqani ko‘rish kamerasining simi yukxonani ochish va yopishda shikastlangan bo‘lishi mumkin”, — deyiladi xabarda.

Ta’kidlanishicha, ishlamaydigan kamera haydovchining ko‘rishini cheklaydi, bu esa baxtsiz hodisa xavfini oshiradi. Tesla mijozlarga xizmat ko‘rsatish markazi defekt aniqlangan elektromobillarni bepul tekshiradi va kerakli ehtiyot qismlarini kompaniya hisobidan o‘rnatadi.

Ma’lum qilinishicha, Tesla elektromobillaridagi ikkinchi muammo kapotning o‘z-o‘zidan ochilishi ehtimoli bilan bog‘liq. Muammoning tavsifida aytilishicha, ba’zi avtoulovlarda oldingi kapot qopqog‘i notekis o‘rnatilgan bo‘lishi mumkin, shuning uchun ikkinchi mandal uni tuzatmaydi.

“Agar kapot to‘g‘ri yopilmasa va u harakat vaqtida birdan ochilsa, haydovchining ko‘rishiga to‘sqinlik qilishi va shu tariqa avariya ehtimolini oshirishi mumkin”, deyiladi xabarda.

Ushbu defekt 2014-2021 yillarda ishlab chiqarilgan 119 009 dona Tesla Model S’da aniqlangan. Elektromobillar chaqirib olingach, Tesla mutaxassislari tekshiruv o‘tkazadi va kapot qopqog‘i joylashuvini bepul o‘zgartiradi.

• AQSh
• Ilon_Mask
• Tesla