31°
Kechasi 18°
Surxondaryo viloyati Sariosiyo tumanida joydashgan “To‘polang” suv omborida joriy yil 22-iyun kuni yangi ishga tushirilayotgan GES quvurlaridan biridagi nosozlik sabab suv miqdori avtomatik ravishda boshqarilmay qolgan va kanalga oqizib yuborilgani va mazkur holat aaks etgan videotasvirlar mahalliy aholi o‘rtasida bir muddat vahimaga sabab bo‘lgani xabar qilingan edi.
“Sputnik” nashrining o‘zbek tahririyati “O‘zbekgidroenergo” AJ Xavfsizlik va maxsus ishlar boshqarmasi boshlig‘i Nodir Artikbayevdan “To‘polang”dagi vaziyatga Afg‘onistonda sodir bo‘lgan zilzilaning taʼsiri bor yoki yo‘qligi haqida maʼlumot oldi.
“Afg‘oniston janubi-sharqidagi Paktika va Xost viloyatlarida sodir bo‘lgan zilzilaning To‘polang suv omboriga umuman taʼsiri yo‘q. Bu borada, suv ombori mutlaqo xavfsiz. Mazkur zilzilaning O‘zbekistonga, bevosita Surxondaryo viloyatiga sezilish kuchi taxminan 3 ball (281 km) ni tashkil etgan”, - degan Artikbayev.
Mutaxassis, shuningdek, suv omborining kuchli zilzilalarga bardoshliligi 8 ballga teng bo‘lib, mustahkam gidroinshoot ekanligini alohida taʼkidlagan.
Qayd etilishicha, Surxondaryo viloyati va ayniqsa suv ombori atrofida yashovchi aholisi xavfsizligini taʼminlash maqsadida To‘polang suv omborida lokal darajasidagi xabar berish va maʼlumot (axborot) etkazishning avtomatlashtirilgan tizimi yaratilgan.
Ushbu tizim doirasida quyidagilar ko‘zda tutilgan:
– “To‘polang” suv ombori to‘g‘onidan Sariosiyo tumani Favqulodda vaziyatlar bo‘limigacha uzunligi 26 km bo‘lgan optik tolali aloqa kabeli tortilgan;
– suv ombori to‘g‘onidan 22 km masofada joylashgan aholi punktlarigacha ovozli xabar berish moslamalari orqali favqulodda vaziyat to‘g‘risida axborot etkazish tizimi bilan taʼminlangan.
“Undan tashqari viloyat aholisiga yuzaga kelishi mumkin bo‘lgan favqulodda vaziyatlar to‘g‘risida ogohlantirish uchun Surxondaryo viloyatining mahalliy darajasida xabar berish va maʼlumot (axborot) etkazishning avtomatlashtirilgan tizimi uzluksiz rejimda ishlaydi”, – deya maʼlumot bergan mutaxassis.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
