Joriy yilning 3-dekabr kuni soat 8:30da poytaxt aholisining asosiy qismini ichimlik suvi bilan ta’minlovchi “Qodiriya” bosh suv inshootida yuqori kuchlanishli elektr ta’minotida nosozlik sababli nasos agregatlarida o‘chish holati yuzaga keldi. Bu haqda “Toshkent shahri suv ta’minoti” korxonasi ma’lum qildi. 

Shu tufayli Toshkent shahrining qator hududlarida ichimlik  suv ta’minoti bilan bog‘liq uzilishlar kuzatilmoqda.
Xabarda aytilishicha, hozirda elektr ta’minoti qayta tiklangan va ichimlik suv gidravlik rejimini tiklash bo‘yicha tezkor choralar ko‘rilmoqda. 

“Toshkent shahrida tez fursatlarda suv ta’minoti o‘z maromiga qaytadi. Keltirilgan noqulayliklar uchun uzr so‘raymiz”, – deyiladi korxona xabarida.

Eslatib o‘tamiz, joriy yil 5-noyabrda ham mazkur suv inshootidagi nosozlik sababli shahar aholisi 4-5 soatga ichimlik suvidan uzilib qolgan edi.

• Suv
• Toshkent