Ijtimoiy tarmoqlarda Toshkent viloyatida qaynona kelinining o‘limiga sababchi bo‘lgani haqida xabarlar tarqaldi.

Bosh prokuratura Matbuot kotibi Hayot Shamsutdinovning maʼlum qilishicha, joriy yil 5 may kuni soat taxminan 10:00 larda Toshkent viloyati Toshkent tumani Chinor 7-tor ko‘chasida yashovchi 1955-yilda tug‘ilgan ayol 37 yoshli kelini bilan o‘zaro oilaviy kelishmovchilik sababli janjallashgan.

Janjal davomida ayol oshxona pichog‘i bilan kelinining chap ko‘krak qismiga bir marotaba zarba bergan. Olgan tan jarohati tufayli jabrlanuvchi shifoxonaga yotqizilgan.

Shifokorlar tomonidan ko‘rsatilgan zarur tibbiy muolajalarga qaramasdan 9 may kuni kelin shifoxonada vafot etgan. Kelinning 3 nafar farzandi bo‘lgan.

Mazkur holat yuzasidan Jinoyat kodeksining 104-moddasi (Qasddan badanga og‘ir shikast yetkazish) bilan jinoyat ishi qo‘zg‘atilgan.

Ayblanuvchi ayolga nisbatan "qamoqqa olish" ehtiyot chorasi qo‘llanilgan.

Toshkent tumani IIB TB tomonidan tergov harakatlari olib borilmoqda.

• Jinoyat
• Prokuratura
• Qotillik
• Toshkent