Toshkent viloyati Parkent tumanidagi xonadonlarning birida sherlar boqilayotgani aniqlandi.
“Mehr va oqibat” hayvonlarni himoya qilish NNT vakili, Parkent tuman Ekologiya boshqarmasi vakillari mazkur xonadonga tashrif buyurib, ikkita sher (erkak va urg‘ochisi) va ularning bolasining holidan xabar oldi.
“Sherlar tor, qorong‘i yerto‘lasimon joyda saqlanar ekan. Bolachasining bir ko‘zi parda bilan qoplangan. U ota-onasidan ajratib olingan. Uy egasining aytishicha sherlarning barcha hujjatlari mavjud (ammo ularni ko‘rmadik) Andijon hayvonot bog‘idan sotib olingan va Krasnogorskda xususiy hayvonot bog‘ini ochish uchun harakatida ekan”, – deb yozmoqda ekologuz kanali egasi Nargis Qosimova.

Shuningdek, u hayvonot bog‘i uchun hali yer ajratilmaganini,  2 yildan buyon qorong‘i joyda saqlanayotgan sherlarning ahvoli, qorni to‘q bo‘lsa ham, qoniqarli emasligini aytadi.

“Hayvonot bog‘i ochilgan taqdirda ham bor budini bugungi kunda sherlarning qornini  to‘ydirishga sarflayotgan oila a’zlari undan qanchalik daromad ola olishadi? 
Hayvonot bog‘i ochilgunga qadar (qachon ochilishi noma’lum) sherlar tor qafasda qanchagacha yashashadi? Kelayotgan qish kunlarida ularning kasal bo‘lishi tabiiy, chunki yerto‘la polida somon ham yo‘q edi. Shervachchaning ko‘zini esa zudlik bilan vetirinarga ko‘rsatish lozim. Eng maqbuli xususiy hayvonot bog‘ini ochishga bel bog‘lagan X.A. yer olib, bog‘ni ochgunicha, hayvonlarni Toshkent hayvonot bog‘iga ko‘chirish kerak. Hayvonlar taqdiriga Ekologiya qo‘mitasi va Ekopartiya ham befarq qolishmas, degan umiddamiz”, – deydi Nargis Qosimova.

• qiziqarli