Toshkent shahri Yunusobod tumani hududidagi Ahmad Donish ko‘chasining 500 metr qismida kuzatilgan cho‘kish holati ortidan Respublika Transport prokuraturasi jinoyat ishi qo‘zg‘atdi.

Mazkur ko‘cha 2020-yilning iyun-avgust oylari oralig‘ida to‘liq qayta ta’mirlanib, foydalanishga topshirilgan va sha munosabat bilan tashkillashtirilgan katta tadbirga davlat rahbari ham tashrif buyurgan edi.

Davlat xavfsizlik xizmati hamda Prokuratura organlari mazkur yo‘lning cho‘kishi yuzasidan olib borgan o‘rganishlari natijasida qator qonunbuzarliklar aniqlangan.

Xususan, mutasaddi tashkilotlar tomonidan “Yunusobod-Turkiston” yer osti metro konstruksiyasining atrofini va yon qismlarini tuproq bilan qayta to‘ldirish va zichlash ishlari sifatli bajarilmaganligi, texnik nazorat talab darajasida olib borilmaganligi hamda avtomobil yo‘lini rekonstruksiya qilishda loyihalashtirish ishlari noto‘g‘ri olib borilganligi sababli yuqoridagi cho‘kish holati yuzaga kelib, natijada davlatga 4,5 mlrd. so‘m miqdorida zarar yetkazilgan.

Hozirda holat bo‘yicha Respublika Transport prokuraturasi tomonidan Toshkent metropoliteni liniyalarini qurish direksiyasi va Toshkent shahar hokimligi Yagona buyurtmachi xizmati injiniring kompaniyasi mansabdor shaxslariga nisbatan Jinoyat Kodeksining 207-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.

Shuningdek, Ahmad Donish ko‘chasida yuzaga kelgan holatni bartaraf etish bo‘yicha mutasaddi idoralar tomonidan tegishli chora-tadbirlar tashkil etilmoqda.

Eslatib o‘tamiz, joriy yilning mart oyida Yunusobod tumani Ahmad Donish ko‘chasidagi avtomobil yo‘lining 500 metr qismida 40-50 sm. gacha cho‘kish holati yuzaga kelganligi tufayli, ushbu hududda transport vositalarining harakati vaqtincha cheklangan edi.

• Jinoyat
• Prokuratura
• Toshkent
• Transport
• hokim