Joriy yilning 3-dekabr kuni Toshkent shahri Yunusobod tumani Otchopar mahallasidagi xonadonlarning birida 7 nafar shaxs ishtirokida bosqinchilik jinoyati sodir etildi.

Toshkent shahar IIBB Matbuot xizmati xabariga ko‘ra, mazkur shaxslar yuzlariga niqob taqib, qurollangan holatda bosqinchilik yo‘li bilan xonadon egasi (ayol)ning oyoq-qo‘llarini skotchlab, undan pullarini saqlaydigan joyni aytishini talab qiladilar.

Natijada yotoqxonadagi seyfni topib, ichidagi pullari bilan olib voqea joyidan yashirinmoqchi bo‘lishganida jabrlanuvchining ikki nafar qizi kelib qolishadi.

Jinoyatchilar ularni ham xonadonga majburlab olib qirishadi va pichoq bilan tahdid qilishadi.

Shundan so‘ng ular xonadon egasining qizlari kelgan Gentra avtomobilidan foydalanib, hodisa sodir bo‘lgan joydan yashirinishadi.

Toshkent shahar IIBB Tergov bo‘limi olib borgan tezkor surishtiruv ishlari sababli mazkur bosqinchilikni uyushtirganlarning shaxsiga aniqlik kiritiladi va qo‘lga olinadi.

Bosqinchilik jinoyatiga boshchilik qilgan shaxs hodisadan bir necha oy avval mazkur xonadonda ustachilik qilgani aniqlandi.

Aniqlanishicha, mazkur 7 nafar shaxs voqea joyidan ketishgach, Gentra avtomobilini yo‘lda qoldirib, boshqa mashinada Toshkent shahridan chiqib ketishadi.Seyfni buzib, ichidagi pullarni o‘zaro taqsimlab olishadi.Jabrlanuvchining ma’lumotiga ko‘ra, pul miqdori 15 ming AQSH dollari bo‘lgan. Ayni paytda zarar miqdorining bir qismi qoplangan.

Mazkur holat yuzasidan Toshkent shahar IIBB jinoyat ishi qo‘zg‘atib, 7 nafar shaxsga nisbatan Jinoyat kodeksining 164-moddasi 4-qismi “a” bandi (Bosqinchilik) va 267-moddasi 2-qismi “b,v” bandlari (Transport vositasini bir guruh shaxslar tomonidan olib qochilishi) bilan jinoyat ishi qo‘zg‘atildi.

Shuningdek, ayblanuvchilarga nisbatan qamoqqa olish ehtiyot chorasi qo‘llangan.

• Bosqinchilik
• Jinoyat
• Toshkent