Toshkent shahri Yashnobod tumanida 8-yanvar kuni haydovchi va uning sherigi yo‘lovchining 800 dollarini kuch ishlatib olib qo‘ydi. Bu haqida Tergov departamenti axborot xizmati xabar berdi.

Ma’lum qilinishicha, Andijon viloyati Asaka tumanida yashovchi 34 yoshli X.J. Yashnobod tumani IIO FMB boshlig‘i nomiga murojaat qilgan. Unda Toshkent xalqaro aeroporti yonida “vodiy pitak”ka borish uchun “Lacetti”ga o‘tirgani, TXAY ko‘chasida joylashgan Andijonga harakatlanadigan yo‘lovchi mashinalar turargohiga yetib kelganida haydovchi va yonida bo‘lgan yo‘lovchi uni mashinadan tushirib, birgalikda qo‘llarini ushlab, bo‘ynidan bo‘g‘ib, pullarini ochiq-ochiqdan talon-toroj qilib, hodisa joyidan yashiringanini ma’lum qilgan.

Shuningdek, olib borilgan tergov-tezkor harakatlari natijasida jinoyatni Toshkent shahrida yashovchi 41 yoshli U.S. va Toshkent viloyatida yashovchi 36 yoshli Yu. A sodir etgani aniqlangan.

Holat bo‘yicha Yashnobod tumani IIO FMB huzuridagi tergov bo‘limi tomonidan U.S. va Yu. A.ga nisbatan Jinoyat kodeksining 166-moddasi 2-qismi “v” bandi (talonchilik) bilan jinoyat ishi qo‘zg‘atilgan. Hozirda gumonlanuvchilar prosessual tartibda ushlangan. Tergov harakatlari davom ettirilmoqda.

• Bosqinchilik
• Jinoyat
• Toshkent