Ijtimoiy tarmoqlarda bir nechta shaxslar fuqaroni urayotganligi aks etgan video tarqalib, turli muhokamalarga sabab bo‘lmoqda. Mazkur holat yuzasidan Toshkent shahar IIB rasmiy munosabat bildirdi.

Joriy yilning 1-iyul kuni taxminan soat 20:25 larda Yunusobod tumani, Iftixor ko‘chasida oldindan o‘zaro tanish bo‘lgan fuqarolar qarz masalasida og‘zaki janjallashgan. Uch fuqaro jamoat tartibini buzgan holda jamiyatda yurish-turish qoidalarini qasddan mensimay, tanishlarini urib tan jarohati yetkazishgan. So‘ng ushbu shaxsni o‘zi kelgan avtomashinada uyi oldiga olib borishgan.

Jabrlanuvchiga shifoxonada birlamchi tibbiy yordam ko‘rsatilganidan so‘ng u uyiga ketgan.

Mazkur holat yuzasidan Yunusobod tumani IIO FMB huzuridagi Tergov bo‘limi tomonidan O‘zbekiston Respublikasi Jinoyat kodeksining 277-moddasi (“Bezorilik”) bilan jinoyat ishi qo‘zg‘atilgan. Gumon qilinuvchilar protsessual tartibda ushlangan. Hozirda tergov ishlari davom etmoqda.

• Jinoyat
• Toshkent