Toshkent shahrida yashovchi fuqaro Yunusobod dehqon bozori hududidagi yer osti yo‘lagida kiyim-kechaklar savdosi bilan shug‘ullanuvchilar faoliyatiga to‘sqinlik qilib, ulardan pul talab qilgan.

U mazkur hududda savdo bilan shug‘ullanishni xohlovchilarga, har oyda 250 AQSh dollari miqdorida soliq solgan.

Joriy yilning noyabr oyi boshlarida bir necha fuqarolar Toshkent shahar IIBBga bu haqda murojaat qilishgan.

Mazkur murojaatda Yunusobod dehqon bozori atrofidagi yoyma savdo rastalarida Laylo ismli fuqaro savdo-sotiq ishlariga to‘sqinlik qilib, ta’magirlik yo‘li bilan pul talab qilayotgani aytilgan.

O‘rganishlarda haqiqatan ham mazkur ayol mazkur hududda savdo qiluvchilardan noqonuniy pul undirib kelayotgani aniqlangan.

Mazkur faktlar asosida olib borilgan tezkor tadbir jarayonida Laylo ismli ayol fuqarolardan 200 dollar miqdorida pul olayotgan vaqtda daliliy ashyolar bilan qo‘lga olingan. To‘plangan hujjatlar qonuniy baholash uchun Toshkent shahar IIBB Tergov boshqarmasigaga topshirildi.

Dastlabki tergov surishtiruv ishlarida aniqlanishicha, mazkur shaxs joriy yilning fevral-noyabr oylari oralig‘ida fuqarolardan jami 73 million so‘m miqdorida “soliq” undirgan.

Mazkur holat yuzasidan Laylo ismli shaxsga nisbatan Jinoyat kodeksining 168-moddasi 2-qismi “a” bandi (Firibgarlik) bilan jinoyat ishi qo‘zg‘atildi. Unga nisbatan qamoq ehtiyot chorasi qo‘llangan.

• Bozor
• Jinoyat
• Toshkent